2025 senesi arman aynıñ 18-24 afta devamında işğalciler işğal etilgen yarımada sakinlerine qarşı "satqınlıq" içün üç cezanı çıqardılar. Qırımda ukrainler de "casuslıq" ve "rus ordusınıñ itibarını tüşürgeni" içün makeme etildiler.
Soñki bir afta içinde Qırımda qanunsız apiske alınğanlar ve mahkemeler aqqında Suspilne Qırım tarif ete.
İşğalli Qırım mahkemesi 28 yaşındaki Lera Cemilovanı müstemlekede 15 yılğa üküm etti
10 ay devamında inkomunikado statusında tutulğan Canköy rayonınıñ 28 yaşındaki sakini Lera Cemilova Qırım "Yuqarı mahkemesi"nde mahkeme etildi. İşğalciler onı "devlet hainligi"nde qabaatladılar. "Qırım uquq qorçalayıcı gruppası" bunı bildirdi.
"Arman ayınıñ 20-nde işğalli Qırım "Yuqarı mahkemesi"niñ mahkemecisi Alla Hinevıç Lera Cemilovanı "devlet hainligi"nde qabaatladı ve umumiy rejimli müstemlekede 15 yılğa üküm etti, 100 biñ ruble para cezasını ve azatlıqtan soñ bir buçuq yıl areket sıñırlavını berdi", — dep haberde qayd etildi.
"Memorial" portalınıñ malümatına köre, Lera Cemilova 10 ay devamında inkomunikado statusında edi.
Feodosiya poçtacısı "Rusiye ordusını itibardan tüşürgeni" içün mecburiy işlerge mahküm etildi — QUQG
Feodosiya (Kefe) şeerinden 62 yaşındaki İrına Volodımırova işğalciler tarafından "Rusiye ordusını itibardan tüşürüv" maddesi içün bir yıl ve sekiz ayğa mecburiy işlerge mahküm etildi. "Qırım uquq qorçalayıcı gruppası", "OVD-Info" resursına esaslanıp, bunı bildirdi. Em de mecburiy işlerden ğayrı, qadınğa eki yıl devamında internette areket etmege yasaq ettiler.
QUQGnıñ yazğanına köre, İrına Vladımırova ilk sefer 2022 senesi çiçek ayında mesüliyetke çekildi. Bundan soñ oña 70 biñ ruble para cezası berildi. Eki kere "Rusiye Silâlı quvetlerini itibardan tüşürüv" aqqında memuriy maddeler (Rusiye Ceza qanunnamesiniñ 20.3.3 maddesiniñ 1-inci qısmı) ve bir kere — "nefret ya da duşmanlıq doğurması" aqqında maddeler (Rusiye Ceza qanunnamesiniñ 20.3.1 maddesiniñ 1-inci qısmı) içün para cezasını aldı.
"İşğalcilerniñ versiyasına köre, o, Ukrayinadaki cenknen "razılığını bildirgen" "Odnoklassniki"de bir yazı derc etti. Ekinci para cezasını "Çat s Radikom" ve "Bratı Yakovlevi Chat" kanallarında ukrayin tilinde tefsirlerniñ derc etilmesi içün tayin ettiler. Birinde: "Ukrayina dronları ruslarnıñ vatandaş obyektlerine de ücüm etmeli. Çünki, bu olmasa, olar ukrayinlilerniñ acısı ve azaplarından ilham alacaqlar... Üçünci "nefret doğuruvı" maddesi boyunca davanıñ sebebi, Telegramda "millet, til, tamır hususiyetlerine köre bir gruppağa menfiy qıymet kesilgen" izaatları oldı", — dep haberde bildirildi.
İşğalciler Ukrayina içün casuslıqta qabaatlanğan Qırımdan qadınnı mahküm ettiler
Qırım sakini Ukrayinanıñ faydasına casuslıq yapqanında qabaatlanıp, işğalciler tarafından on beş yılğa mahküm etildi.RİA "Novosti Krım", işğalli prokurorlıqqa esaslanıp, bunı bildirdi. O, bir buçuq yılğa azatlıqtan marum etildi ve 100 biñ ruble para cezasını aldı.
İşğalli tahqiqatnıñ malümatına köre, qadın 2024 senesi saban ayında ukrayin istihbaratınıñ vekilleriniñ idare etkenleri cemiyetke qoşuldı. Olarnıñ vazifelerine köre, o, Rusiye AMSnıñ ve arbiy hızmetçileriniñ yerleşüv yerleriniñ fotolarını çıqarğan edi.
İşğalciler Sevastopol sakinini satqınlıqta qabaatlap, 14-nci koloniyağa mahküm ettiler
İşğalciler Sevastopol (Aqyar) sakinini 14 yılğa qattı rejimli müstemlekesine ve bir yılğa serbestlikni sıñırlamasınen mahküm ettiler. Oña da 200 biñ ruble (tahminen 60 biñ grivna) cöreme tayin ettiler. Qırımtatar resurs merkeziniñ malümatına köre, söz Serğiy Bodnaraşık aqqında kete.
"2023 senesi qara qış ayından orta küz ayına qadar vaqıt içinde erkek, öz teşebbüsinen fotoresimlerni ve arbiy ve mahsus tehnikanıñ, em de Rusiye Federatsiyası Silâlı Quvetleriniñ diger obyektleriniñ yerleşken yerleri aqqında malümatnı Ukraina mahsus hızmetleriniñ vekillerine Telegram-ğa yolladı", – dey RİANostige messencerinde" – denile işğal Qırım FTH-ne atıf etilip RİA "Novosti Krım"-nıñ beyanatında.
İşğalciler Qırım demiryolunda terakt azırlağanında qabaatlanğan qadınnı 15 yılğa üküm ettiler
İşğalciler, Qırım demiryolunda terakt azırlağanında qabaatlanğan qadınnı 15 yılğa üküm ettiler. İşğalli tahqiqatnıñ versiyasına köre, o, ukrayin mahsus hızmetleriniñ vazifesinen reley dolabını patlatmağa planlaştıra edi. Qadınnı Simferopolda (Aqmescitte) tuttılar. Terroristik areketke azırlıq ve devlet hainligi boyunca cinaiy dava açıldı. Bunı RİA "Novosti Krım" bildirdi.
"Tintüv vaqtında yaqalanğan qadınnıñ evinde el yapımı ateş aleti, olarnı yapmaq içün parçalar ve cep telefonları tapıldı. Qadınnıñ faaliyeti Ukrayina toprağından Viber messencerinden koordinat etildi, bu onıñ tutıp alınğan bağ vastalarında olğan malümatnen tasdıqlana", — dep haberde qayd etildi.
Telegram, WhatsApp, Facebook ve YouTube-ta Suspilne Qırım haberlerine abune oluñız
