Salavatnıñ 2-nci müstemlekesinde tutulğan siyasiy mabüs Teymur Abdullayev ceza izolâtorına (ŞİZO) yollanıldı ve tek kamera türlü odağa (TKTO) avuştırılacağınen qorquzalar.
Onıñ apayı Alime Abdullayeva "Qırım birdemligi"ne bunı bildirdi.
Onıñ aytqanına köre, müstemlekede sebepleri añlatılmadı.
"Arman ayınıñ 13-nde mektüp keldi. Onıñ yazğanına köre, onı birinci künü ŞİZOdan çıqardılar, altıncı künü ise kene ŞİZOğa qaytardılar. Tekrar qapattılar — izaat bermeyler. Şimdi ise onı TKTOnen qorquza. Müstemlekege ilk sefer kelgende de aynı böyle qorqutmalar bar edi. Ve endi kene de öyle oldı. TKTO — eñ ciddiy cezadır. Onıñ sağlıq vaziyeti öyle qabul etilmez", — dep Alime Abdullayeva tarif etti.
Beş yıldan ziyade müstemlekede bulunğan siyasiy mabüs tahminen 1021 kün ceza izolâtorında tutuldı.
"ŞİZOğa yerleştirüvler Abdullayev 2020 senesi saban ayında Salavatqa ketirilgen soñ başlandı. O vaqıttan berli o, bir qaç kere kartserge alındı. İzolâtorda bulunğan soñ onı sert tutuluv şaraitine (STŞ) yollaylar. Çoqusı allarda müstemleke nezaretçileri qırımtatarlarğa ne içün izolâtsiya etilgenini ve ne içün bulunuv müddeti uzatılğanını añlatmaylar. Soñki belli sebebi, Teymur Abdullayev namaz vaqtında müstemleke yolbaşçısını selâmlamaması oldı", — dep "Qırım birdemligi" yazdı.
Siyasiy mabüs, ''Zonatelekom'' vastasınen telefon etmege de yasaq eteler. Qorantasınen tek mektüpler vastasınen bağlana bile.
Bu sene oraq ayında o, apiske alınğan doquz yıl soñ kiçik qızı Asmanen ilk sefer körüşti. Baba qızını soñki sefer apiske alınğan künü körgen, o vaqıt o üç aylıq edi.
Abdullayev apishanede bulunğan vaqıt yüksek qan basımınen meseleleri peyda oldı, körme qabiliyeti fenalaştı, büyrek hastalığı peyda oldı. Qorantası sağlıq meselelerini onıñ daima SİZOda bulunmasınen bağlay, dep "Qırım birdemligi" yazdı.
Hatırlatamız ki, 2016 senesi orta küz ayında Uzeir ve Teymur Abdullayevlerniñ tuvğanları daa üç qırımtatarnen beraber apiske alındı. Olarnı "Hizb ut-Tahrir" islâm siyasiy firqasınıñ faaliyetinde qabaatladılar.
2019 senesi ilk yaz ayınıñ 18-nde Rostov-na-Donudaki Şimaliy Kavkaz bölgeniñ arbiy mahkemesi ağa-qardaş Teymur ve Uzeir Abdullayevlerni 17 ve 13 yılğa üküm etti.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
