İşğal etilgen Qırımnıñ Bağçasaray rayonınıñ altı meskün yerinde quyular qurudı. Ealige suv ketirile.
RİA "Novosti Krım", rayon memuriyetiniñ işğalli yolbaşçısı Anjelika Yastrebovanıñ sözlerine esaslanıp, bunı bildirdi.
"Mesele Trudolübivka, Ğlıbokıy Yar, Male Sadove, Velıke Sadove, Sırin ve Kuybışevenen bağlı. Bu meskün yerlerde suv ketirilmesi teşkil etildi. Kazankı köyünde de suv sıñırlavı bar. Anda qaza sebebinden ağlarda suv cedvelge köre berile", — dep haberde qayd etildi.
Anjelika Yastrebovanıñ aytqanına köre, Şçaslıvenske yapma gölünden suv borularınıñ qurucılığı rayonnıñ suv ihtiyaclarını qısmen qapatacaq. İşlerniñ 2026 senesiniñ soñuna qadar bitirilmesi planlaştırıla.
Hatırlatamız ki, arman ayınıñ 20-nde "Sarı şerit" areketiniñ bildirgenine köre, işğal etilgen Qırımda suv teminlevinen bağlı meseleler arta. Eki aftadan berli Aluşta, Maloriçenske, Malıy Mayak, Luçıste, Verhnâ Kutuzivka köyleriniñ bir qısmı suvsız qaldı.
"Sarı Şerit" areketiniñ faalcileri haber eteler ki, suv kesilüvi sıq-sıq Bağçasaray ve Simferopol rayonlarında qayd etile", — dep haberde bildirildi.
İşğal etilgen Aluştada suv qıtlığı sebebinden soqaqlarda suv çapçaqları qoyuldı. Çapçaqlardan tehnikiy ihtiyaclar içün suv almaq mümkün. Arman ayınıñ 6-nda Aluşta memuriyetiniñ işğalli yolbaşçısı Galina Ogneva bunı bildirdi.
İşğalli Qırım akimiyeti suv meseleleriniñ peyda oluvını tabiiy faktorlar, furtuna, sıcaqnen añlata.
İqtisadiyat ilimleri doktorı, professor ve "Kıyiv-Moğıla akademiyası" Milliy universitetiniñ tabiat ilimleri fakultetiniñ dekanı Yevğen Hlobıstovnıñ fikirince, Qırımda suv meseleleriniñ peyda oluvınıñ bir qaç sebebi bar: resurs ordu ihtiyacları içün qullanıla, Rusiyeden köçüv neticesinde ealiniñ sayısı arta. Bundan ğayrı, Hlobıstovnıñ aytqanına köre, işğal yılları devamında "akimiyet" yerastı suvlarınıñ nezaretsiz qullanılmasına yol berdi. Bu sebepten suv miqdarı ve keyfiyeti bayağı eksildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
