İşğal etilgen Qırımda internetniñ söndürilüvi bankomat ve tükânlarda kassalarnıñ çalışmasınen bağlı meselelerni doğura. Qırım sakinleriniñ böyle şikâyetleri Milliy muqavemet merkeziniñ (MMM) çatbotına kele.
MMM Telegramda bunı bildirdi.
"Bir aftadan berli yarımadada internet yoq, ve vaziyet kerginleşe. İnsanlar tükânlarda kartnen ödeme yapmağa imkân olmağanından şikâyet eteler — kassa aletleri çalışmay. ATM-er "ölgen", para çekmek — meseledir. Ötmek, suv, ilâclar qıtlıqta. Bir qaç tükânda "borc"ğa bereler, amma anda nevbetler ve boş raflar bar. Biz kerçekten de reinelermiz. Para almaq içün başqa şeerge barmaq kerek. Pensiyacılar ne yapmaq kerekler?" — dep MMM yazdı.
Hatırlatamız ki, daa evel yarımadanıñ işğalli "içki siyaset, malümat ve bağ nazirligi" "duşman ücümlerine qarşılıq köstermek ve Qırım vatandaşlarınıñ havfsızlığını temin etmek maqsadınen" uzun müddetke mobil internetini bütünley söndüre bilecegini bildirdi.
Arman ayınıñ 19-nda işğalli Qırım yolbaşçısı Sergey Aksönov yarımadada mobil internetini söndürüv algoritmini çezmege ve sıñırlavlarnı yımşatmağa tırışacaqlarını bildirdi, dep RİA "Novosti Krım" haber etti.
"Biz şimdi İnternetke qoşulmaq qararınıñ tezligi boyunca areket etüv sistemasını taqdim ettik. Bir afta içinde bu tedbirni yımşatmağa qarar alınacaq, dep tüşünemiz", — dep Aksönov ayttı.
"Sarı şerit" areketiniñ faalcileri, Suspilne Qırımğa bergen izaatlarında, mobil bağnıñ toqtatıluvı daa resmiy tenbiyelevden evel olğanını bildirdiler. Faalcilerniñ fikirince, işğalciler Qırım saknlerini mobil interneti olmadan yañı yaşayışqa azırlaylar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
