Herson vilâyetiniñ Kahovka rayonında Rusiye işğalcileri tarafından qanunsız şekilde qurulğan "Askaniya-Nova" biosfera qoruğında yañı reber — Qırımdan Olena Nozdrina oldı. Bundan evel o, yarımadada saylavlarnıñ teşkil etilmesinde iştirak etti ve işğalli memuriyetlerde çalıştı. Soñki yıl ise "qoruqnıñ müdiriniñ muavini" edi.
Jurnalist taqiqatları merkezi öz menbaları ve işğalli cedvellerge esaslanıp bunı bildirdi.
"O — tecribeli işdeşçi, Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ — terciman) Demiryol rayonında 285-nci bölük saylav eyyetiniñ azası olaraq Qırımda ruslar içün qanunsız saylavlarnı keçirdi. Qırımnıñ Rusiye Federatsiyasınıñ qanunsız işğalinden soñ Olena Nozdrina Simferopolnıñ işğalli memuriyetiniñ belediye mülkiyeti departamentiniñ topraq munasebetleri idaresiniñ topraq aqlarını yerine ketirüv bölüginiñ reberi olıp çalıştı. 2016 senesiniñ soñunda onı Qırım mülkiyet ve topraq munasebetleri nazirliginiñ kira munasebetleri idaresiniñ kira ve añlaşma munasebetleri bölüginiñ baş mesleatçısı olaraq tayinlediler", — dep jurnalistler qayd eteler.
Menbalarnıñ malümatına köre, Olena Nozdrina işğal etilgen qoruqta endi bir yıldır çalışa — başta o, anda "müdirniñ muavini" edi. Oğlu da anda çalışqan edi, o, ayvanat bağçasına biletlerni satqan edi. Bundan da ğayrı, Nozdrina işğalli kütleviy haber vastalarında çoq yayınlanmay, ve ruslar qanunsız qoruqnıñ müdiri olaraq Dmitriy Meşçerâkovnı adlandıralar. Açıq olğan cedvellerge köre ise, "qoruqnıñ müdiri" Olena Nozdrin qayd etilgen.
Falts-Feyn adına "Askaniya-Nova" biosfer qoruğınıñ işğali aqqında ne bilemiz
2022 senesi kiçik aynıñ 24-nde saba saat doquzda Askaniya ve Çaplınka sıñırında Rusiye tehnikası peyda oldı. Bir yıldan ziyade müessise muhtar rejimde, amma ukrayin formatında çalışa edi.
2023 senesi çiçek ayınıñ 7-nde Gornostayivskıy Ruh Telegram kanalı Rusiye arbiy hızmetçileri "Askaniya-Nova" biosfera qoruğında safari teşkil etkenleri aqqında fotoresimni derc etti. "Askaniya-Nova" biosfera qoruğınıñ reberligi park toprağında sarnlarnıñ öldürüvi aqqında malümatnı red etti.
2023 senesi ilk qış ayında "Askaniya-Nova" biosfera qoruğınıñ işğalli memuriyeti "Rostovskiy" tabiat biosfera qoruğı ve "Çölniñ canlı tabiatı" siyrek ve ğayıp olğan türlerniñ saqlav ve ğayrıdan tiklev birleşmesinen qanunsız alda ayvanlarnı deñiştirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
