Qırımtatar siyasiy mabüsi Mecit Abdurahmanovnıñ Çuvaşiya Cumhuriyetiniñ müstemlekesinde bulunğanı 11 ay devamında ruslar onı bir kün bile ŞİZOceza izolâtorıdan ya da KTOkamera türlü odadan çıqarmadılar. Bundan da ğayrı, müstemlekeniñ memuriyeti tibbiy yardım içün onıñ muracaatlarını red ete, oña ilâclarnı ve tuvğanları yollağan paralarnı bermey.
Onıñ apayı Elmira Abdurahmanova "Qırım birdemligi"ne bu aqqında tarif etti.
Mecit Abdurahmanov endi 11 aydan berli Çuvaşiya Cumhuriyetiniñ Tsıvilsk şeerindeki 9-ncı tüzetüv müstemlekesinde buluna. O, 2022 senesi "Hizb ut-Tahrir davası" çerçivesinde qanunsız olaraq 12 yılğa üküm etildi.
"Müstemlekege kilgen soñ, Mecit bir kün bile anda qalmadı. Bütün bu vaqıt devamında onı ŞİZOda, soñra ise KTOda tutalar. Soñki bir qaç ay devamında oña, esapqa qoyğanımız paranı qullanmağa bile, izin bermeyler. Bizge körüşüvni red eteler, telefon etmege bermeyler, tek mektüpler vastasınen qonuşamız", — dep siyasiy mabüsniñ apayı tarif etti.
Elmira Abdurahmanova, aqayı apiske alınğa soñ sağlığı fenalaşqanını bildirdi. Onıñ aytqanına köre, müstemleke feldşeri ve ekimi tibbiy yardımnı bermeyler.
"Onıñ yüzü ve bedeninde lekeler bar, aşqazan ülseri ağırlaştı, tişleri qırıla, devamlı baş ağrısı ve yüksek qan basımı bar", — dep qadın tarif etti.
Qorantası siyasiy mabüske kerekli vitaminler ve ilâclarnen paket yolladı, amma müstemleke oña ilâclarnı bermedi, onı daa soñra ekim vastasınen berecegini ayttı. Elmira Abdurahmanova, müstemleke memuriyeti onıñ aqayına nisbeten peşin fikirnen yanaşa ve oña basqı yapa, dep tüşüne. Soñki sefer qoranta körüşüvine izin eki yıl evelsi Saratovda berildi.
Hatırlatamız ki, 2019 senesi saban ayınıñ 27-nde Qırımda kütleviy tintüvler keçirildi. Tahqiqat tedbirleri esasen qırımtatarlarnıñ yaşağanları Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarındaki Kamyanka, Stroğanivka, Bile köylerinde keçirildi. Rusiye FSBsiniñ hadimleri o vaqıt yigirmi insannı yaqaladılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñra bu dava boyunca daa eki qırımtatar tutuldı.
25 qırımtatar cemaat faalcisi, şu cümleden Mecit Abdurahmanov, "Hizb ut-Tahrir" islâm siyasiy firqasınen alâqası bar olğanında qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileri ola.
2023 senesi mayısnıñ 12-nde Cenübiy bölgeniñ arbiy mahkemesi faalci Mecit Abdurahmanovnı 12 yılğa mahküm etti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
