Arman ayınıñ 14-nde esirlerni deñiştirüv çerçivesinde "Qırım İçki işler nazirliginiñ Baş idaresi yolbaşçısınıñ sabıq muavini" Mıkola Fedorân Rusiyege ketti. 2024 senesi orta küz ayında ukrayin mahkemesi onı devlet hainliginde qabaatladı ve 12 yılğa mahküm etti.
"Men öz halqıma qaytmağa isteyim" devlet teşebbüsi bunı bildirdi.
"Ukrayinanı terk etken Fedorân ve oña oşağan cinayetçilerniñ profilleri "Хочу к своим" leyhasınıñ saytında "Çıqqan" qaydınen taqdim etildi", — dep haberde bildirildi.
Kıyivniñ Şevçenko rayon mahkemesiniñ qararında qayd etildi ki, prokurornıñ muracaatınen Fedorân Rusiye Federatsiyasına onı arbiy esir olaraq deñiştirmek içün bermege qarar alınğanı sebebinden işten boşatıldı.
Tahqiqatnıñ malümatına köre, Qırımda Fedorân Rusiye FSBsiniñ faaliyetine yardım etti — eñ az 12 kere "Çornomornaftogaz" şirketiniñ qanunsız tintilmesi, Ukrayina vatandaşlarınıñ tutıp alınmaları ve apis yerlerine avuştırılmaları içün naqliyat berdi. Bu areketler Rusiyede terrorcı sayılğan Hizb ut-Tahrir islâm siyasiy firqasınen küreşnen gizlengen edi.
Hatırlatamız ki, kiçik aynıñ 6-nda Kıyiv istinaf mahkemesi birinci instantsiya delillerini qabul etip, ükümni deñiştirmedi.
Mıkola Fedorân aqqında ne bilemiz
Mıkola Fedorân yarımada işğal etilmeden evel Qırımdaki cemaat havfsızlığı militsiyasınıñ yolbaşçısı olıp çalışqan edi. 2011 senesi yedek vazifesinden boşadı ve "Çornemorneftegaz" devlet şirketinde naqliyat idaresiniñ yolbaşçısı olıp çalıştı. Qırım işğal etilgen soñ o, Rusiyeniñ "milliyleştirgeni" işhanede qaldı.
İşğalciler tarafından bu şirket "devletleştirilgen" ve Qara deñiz yalısında qazma platformaları zapt etilgen soñ, UHH ve muhtariyet prokurorlığınıñ versiyasına köre, Fedorân "işğalli quvetçilerge "Hizb ut-Tahrir" davalarında qanunsız tintüvler ve vatandaşlarnıñ tutulmasında muntazam sürette yardım ete edi.
Taqiqatnıñ malümatına köre, Fedorân FSB-ge hızmet naqliyatını berdi, soñra onı yerli sakinlerniñ, hususan qırımtatarlarnıñ, tintüvleri ve qanunsız apis etilmesi vaqtında qullanğanlar. Thqiqat, eñ azından 12 kere FSBge böyle yardım etkenini tüşüne.
Mıkola Fedorân 2020 senesi küzde "Kalançak" keçit noqtasında vaqtınca işğal etilgen Qırımğa çıqmağa tırışqanda tutuldı. Şübeliniñ cep telefonında Ukraina uquq qorçalayıcıları Ukraina Milliy gvardiyasınıñ sabıq komandanı Mıkola Balan ile mektüplerni taptı. Bundan da ğayrı, Fedorânnıñ yaqalanuvı vaqtında RF migratsiya hızmetiniñ qanunsız şekilde teşkil etilgen organları tarafından berilgen Rusiye pasportı tapıldı.
2020 senesi boş aynıñ 9-nda Herson şeer mahkemesi polkovnikni 2021 senesi qara qış ayınıñ 5-ne qadar apiske aldı. "Devlet hainligi" maddesine köre, oña 12 yıldan 15 yılğa qadar apis cezası berile bile. Tutulğan soñ Fedorân açlıq ilân etti, amma SİZOda bundan red etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
