Arman ayınıñ 13-te Roskomnadzor Rusiye Federatsiyası ve Ukrayinanıñ vaqtınca işğal etilgen topraqlarınıñ, şu cümleden Qırım sakinleri içün Telegram ve WhatsApp messencerlerinde telefon etmek imkânı sıñırlanğanını bildirdi. Böyle telefon etmeler, idda etilgenine köre, aldatıcılar tarafından para talap etmek, em de "vatandaşlarnı diversiya ve terror areketlerine celp etmek" içün qullanıla. Messencerlerniñ başqa vazifeleri de irişilir.
Qırımnıñ yerli sakinleri, Suspilne Qırımğa tefsirlerinde Telegram ve Whatsaptan telefon etmelerniñ qapatılğanını Rusiyede yapılğan yañı Max messencerinen bağlaylar.
"Endi olar telefon etmelerni qapatırlar, soñ qalğan er şey — vaqıt meselesi. Olar öz Maxını ilk küz ayından başlap zornen endirmege emir etecekler. Men bilem ki, bazı hastahanelerde olar endi zornen endirdiler, mekteplerde ana-baba çatları da. Demek, tek vaqıt meselesi, olar: "Ne içün sizge şu duşman messencerleri kerek, bizim sovet qayıq küregimiz bar", — dep yarımadanıñ sakini qayd etti.
"Uquq qorçalayıcı organlarnıñ malümatlarına ve vatandaşlarnıñ çoqtan-çoq muracaatlarına köre, tış memleketlerniñ messencerleri Telegram ve WhatsApp aldatuv ve para talap etmek, Rusiye vatandaşlarını diversiya ve terror faaliyetine celp etmek içün qullanılğan esas ses hızmetlerine çevirildi", — dep Roskomnadzor "RBK" rusiye haber hızmetine bildirdi.
Rusiye Federatsiyasınıñ raqamlı inkişaf nazirligi neşirge bildirdi ki, hızmetler Rusiye qanunlarınıñ talaplarına uyğun olacaq soñ telefon etmek mümkün olacaq.
Telefon etmelerni qapatmaq teşebbüsi Rusiyeniñ yetekçi mobil operatorlarından – "MTS", "Megafon", "Bilayn" ve "Tele2" tarafından keldi. "RBK"niñ malümatına köre, teklif daa mayıs ayında ilân etilgen edi, amma soñ o, yardım tapmadı.
Qullanıcılar resmiy ilândan bir qaç künden evel Telegram ve WhatsApp vastasınen telefon etmeknen bağlı meselelerden kütleviy şekilde şikâyet etmege başladılar, dep rusiye jurnalistleri qoştılar.
Blok cevap olaraq, Telegram platforma vastasınen suistimalğa, şu cümleden zorbalıq, diversiya ve aldatuvğa çağıruvlarğa qarşı faal küreşkenlerini neşirge ayttı.
Bundan evel işğalli Qırım İçki siyaset, haber ve alâqa nazirligi mobil internetni uzun müddetke bütünley söndüre bilecegini bildirdi. Bu arada, internet provayderleri çalışmağa devam etecek.
Yerli sakinler Suspilne Qırımğa internet bağınıñ bozulğanını tasdıqladılar. "Sarı şerit" areketiniñ faalcisi Suspilne Qırımğa ayttı ki, işğalciler Qırım sakinlerini mobil internetsiz yañı yaşayışqa azırlaylar.
Ukrayina tış istihbarat hızmetiniñ malümatına köre, tek 2025 senesi oraq ayında Rusiyede rekord 2099 internet kesilüvi qayd etildi, olarnıñ çoqusı işğal etilgen Qırımda oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
