Halqara tamır halqlar kününde Ukraina tış işler nazirligi beyanat çıqarıp, bütün dünyanı qırımtatarlarnı, qırımçaqlarnı ve qaraylarnı Rusiye tarafından yapılğan basqılar ve diskriminatsiyadan qorçalamağa çağırdı.
Bu aqta Ukraina Tış işler nazirliginiñ resmiy saytındaki tefsirinde qayd etile.
Tış işler nazirligi qayd ete ki, ruslarnıñ işğal etilgen Qırımğa kütleviy sürette köçürilmesi yarımadanıñ tamır sakinleriniñ aynı vaqıtta köçmesi, tarihiy abidelerniñ ve muqaddes yerlerniñ yoq etilmesi, em de tilniñ deñişmesinen beraberlikte keçe.
"Bugünde Ukrainanıñ er üç tamır halqı Rusiye Federatsiyasınıñ, hususan işğal etilgen Qırımda, silâlı tecavuzınıñ neticelerinden çekişe. Camiler ve evlerde tintüvler. Qaraimler ve qırımçaqlar, sayısı ceetinden az, amma tekrarlanmaz asıl halq olaraq, asılında işğal etilgen yarımadanıñ medeniy meydanından ğayıp olalar. Rusiye mecburiy bütünleşüv siyasetini amelge keçire, bu ise asılında işğal etilgen yarımadada avtohton müitniñ yoq etilmesine ketire", — qayd ettiler tış işler nazirliginde.
Şunıñ içün er yıl arman aynıñ 9-da qayd etilgen Halqara tamır halqlar kününde Ukraina halqara cemiyetke beyanatnen muracaat ete.
"Ukraina halqara cemiyetini Rusiye Federatsiyasınıñ Ukraina tamır halqlarına nisbeten basqılıq ve diskriminatsiya siyasetini qabaatlamağa, uyğun halqara teşebbüslerni, şu cümleden BMT çerçivesinde desteklemege, tamır halqlarnıñ medeniy, til ve ruhiy mirasını qorçalamağa yardım etmege çağıra", — dep qoştılar Tış işler nazirliginde.
Telegram, WhatsApp, Facebook ve YouTube-ta Suspilne Qırım haberlerine abune oluñız
