"Üçünci Canköy gruppası" davasınıñ iştirakçisi Enver Halilayevniñ köbek quyuldığını çıqarmaq içün ameliyat kerek. İşğalli akimiyet taqiqat devam etkenine qadar areket etmege istemeyler.
Siyasiy mabüsniñ tanışqanı menba "Qırım birdemligi"ne bunı bildirdi.
"Qırım birdemligi"niñ subetdeşiniñ aytqanına köre, mahkeme tahqiqatı devam etkenine qadar Halilayevağa ameliyat yapıp olamaylar. Şimdi Rostov-na-Donu şeeriniñ 1-nci SİZOda buluna. Qırımtatarnıñ bildirgenine köre, onı Rusiye Federatsiyasınıñ Rostov vilâyetindeki FCİFederal cezalandıruv idaresiniñ tibbiy bölüginiñ hadimleri ziyaret ettiler. Olarnen beraber o, ameliyat planını azırladı", — dep haberde qayd etildi.
Bundan da ğayrı, Halilayevniñ eşitüv qabiliyeti fenalaştı, başı ağrıdı. "QM"niñ menbasınıñ tahminlerine köre, bu, qan damarı meseleleri ya da eşitüv aletiniñ qullanuvınen bağlı ola bile, bu da zarar ketire bile.
"Oraq ayınıñ başında Enver Halilayevniñ hastalıqları aqqında onıñ advokatı aytqan edi. O qayd etti ki, mabüsniñ otit, yürek-damar hastalıqları, köbek quyuldığı ve diger hastalıqları bar. İmayeciniñ delillerine baqmadan, mahkeme qorçalayıcı tedbirni uzattı ve Halilayevni eñ azından orta küz ayınıñ 13-ne qadar apiste qaldırdı", — dep "Qırım birdemligi" yazdı.
Enver Halilâyev — Hizb ut-Tahrir davasınıñ üçünci Canköy gruppasınıñ mabüsidir.
"Hizb ut-Tahrir davası"nıñ üçünci Canköy gruppası aqqında ne bilemiz
2024 senesi martnıñ 5-nde saba Qırımnıñ Bağçasaray ve Canköy rayonlarında Rusiye quvetçileri on qırımtatar adamınıñ evini tinttiler.
Aynı künü "makeme" dört qırımtatar faalcisini - Memet Lümanov, Aziz Azizov, Rustem Osmanov ve Mustafa Abduramanovnı yaqaladı. Olarnı 2024 senesi mayısnıñ 4-ne qadar 2. SİZOsına yolladılar.
Martnıñ 6-nda işğalli makeme 6 qırımtatar faalcisine tevqif tedbirlerini belgiledi. Sabıq imam Remzi Kurtnezirovğa ev apsi şeklinde tevqif tedbirini saylamaq qararı çıqarıldı. Amet Nariman, Ali Mamutov ve Arsen Kaşka, Enver Halilayev ve Vahid Mustafayevge işğalli mahkeme bu sene mayısnıñ 5-ne qadar SİZOda tutuv şeklinde tedbir aldı.
Er kesni "Hizb ut-Tahrir" islâm siyasiy firqasında iştirak etmege red eteler. Apiske alınğanlarnıñ çoqusı — çoq balalı babalardır.
Aqmescitniñ Kıyiv bölge makemesi çiçek ayınıñ 25-nde "Hizb ut-Tahrir davasınıñ" üçünci Canköy gruppasınıñ mabüslerini apiske almağa devam ettirdi. Olar Canköy ve Canköy rayonından qırımtatarlar - Enver Halillayev, Nariman Ametov, Ali Mamutov, faalci Arsen Kaşka ve Lobanovo köyündeki caminiñ imamı Vahid Mustafayev. Olar arman ayınıñ 3-ne qadar Aqmescitteki 2. SİZOda qalacaqlar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırım musulmanlarını da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
