İşğal etilgen Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) Rusiye defalarca ücüm etilgen neft bazasını ğayrıdan işke qoydı ve qoruvnı quvetleştirdi: etrafını telnen sarıp, qulleler, kameralar, gizleyici vastalar ve dronlardan saqlanğan ağlar yerleştirdiler. Obyekt üstünde helikopter qaravul ete.
Yerli faalcilerden biri anonimlik şartınen "Qırım.Aqiqat" neşirine bu aqqında haber berdi.
"Neft bazasını tam olaraq bir qaç sıra tikenli telnen qapattılar, qorada video kameralar yerleştirildi, qoruyıcı ve közetüv qulleleri quruldı, etrafında dronlardan saqlanğan ağlar çekildi, gece neft bazası yanından yarıq yoq, yani yarıq maskası qoyuldı. Kün devamında deñiz üstünde arbiy vertolöt uça. Ve bu tek körüngen qoruv seviyeleri, belki de tıştan baqılğanlarğa irişilemez olğan tedbirler bardır", — dep faalci tarif etti.
Neşirniñ menbalarına köre, soñki ücümler bir qaç kün evelsi oldı.
"Arman ayınıñ 1-nde gece deñizde, neft bazası civarında, bir AMS patlavı, soñra ise — pek yüksek sesli bir silâ uçurıluvı çıqtı, o, maqsatqa urdı, patlav dalğası, yalınıñ birinci sıñırında yerleşken evlerniñ pencereleri titredi. Amma arman ayınıñ 2-nde gece deñizde, neft bazası yanında, pek gürültüli edi, AMSnıñ çoq sayılı silâ uçurıluvını körmek mümkün edi", — dep Qırım.Aqiqatqa faalci qayd etti.
Ukrayina tarafı bu malümatnı resmien izaatlamadı.
İşğal etilgen Feodosiyada (Kefede) bir neft bazası 2024 senesi orta küz ayınıñ 7-ne keçer gecesi ücüm etildi. O vaqıt şeerde yanğın sebebinden şeer fevqulâde vaziyet rejimi ilân etildi, tahminen 300 insan tahliye etildi.
2024 senesi saban ayında bu neft bazasına da dronlar ücüm etti, o vaqıt esas neft borusı zarar kördi. Aynı obyekt 2024 senesi ilk qış ayında ve boş ayda ücüm etilgen edi.
İşğalciler daa evel ücümge oğrağan Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) neft bazasınıñ işini ğayrıdan başlattılar. "Ateş" arbiy-partizan areketiniñ agentleri "Yugtorsan" neft çıqarıcı müessisesini istihbarat ettiler. Bu, Rusiye Federatsiyasınıñ Qara deñiz flotunıñ Sevastopoldaki (Aqyardaki) esas neft bazasıdır. O, 810-ıncı ayrı deñiz piyade brigadası ve onıñ qorumasını temin etken diger arbiy bölüklerniñ bulunğan yeriniñ yanında yerleşe.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
