"Ateş" arbiy-partizan areketiniñ agentleri "Yugtorsan" neft çıqarıcı müessisesiniñ teşkerüvini keçirdiler. Bu, Rusiye Federatsiyasınıñ Qara deñiz flotunıñ Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) esas neft bazasıdır. O, 810-ıncı ayrı deñiz piyade brigadası ve onıñ qorumasını temin etken diger arbiy bölüklerniñ bulunğan yeriniñ yanında yerleşe.
"ATEŞ" areketi Telegramda bunı bildirdi.
"Bu obyektke evelden muvafaqiyetli ücümler yapılğan edi, ve bizler büyük yanğınnıñ bir künden ziyade devam etken tesirli körünişini kördik. Şimdi terminal çalışmağa devam ete, ve er kes "ateş numayışı"nıñ tekrarlanmasını bekley. İleride semereli areketler planlaştırmaq içün bütün toplanğan malümat, şu cümleden koordinatları, iş rejimi ve qoruv vastaları, Ukrayina mudafaa quvetlerine berildi", — dep "ATEŞ" bildirdi.
"Yugtorsan" neft çıqarıcı müessisesiniñ terminalı, Sevastopolniñ (Aqyarnıñ) Kozak körfezinde Manganar burnunda, çeşit çeşit mazut, çiğ neft ve neft mahsulatlarını taşımaq ve saqlamaq içün qullanıla.
Daa evel "Ateş" arbiy-partizan areketiniñ agentleri işğal etilgen Sevastopolnıñ (Aqyarnıñ) Cenübiy körfezinde (Çoban Limanında) teşkerüv keçirgenlerini ve Moskva devlet universitetiniñ filialı yanındaki quru limannı qıdırğanlarını bildirgen ediler. Anda partizanlar aqşam ve gece faalligini qayd ettiler — bu obyektlerni vaqtınca işğalciler arbiy tehnika ve yedeklerni saqlav ve tamir etüv yeri olaraq qullanalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
