2025 senesiniñ başından itibaren Ukrayinada Qırımdan beş işğalli mahkemeci mahküm etildi. Bundan ğayrı, yarımada prokurorlığı işğalli akimiyetnen işbirlik yapqan 25 şimdiki ve 218 sabıq mahkemecige qarşı qabaatlav aktlarını mahkemege yolladı.
ZMINA insan aqları merkezi Qırım MC ve Sevastopol (Aqyar) şeeri prokurorlığına atfı etip, bunı bildirdi.
"UHHniñ Qırım Muhtar Cumhuriyetindeki Baş idaresiniñ tahqiqat idaresi tarafından mahkemeden evel tahqiqat etilgen cinaiy davalarda mahkemege 25 "mahkemeci"ge qarşı qabaatlav aktları yollanıldı. Olardan: 22-si — 111-1-nci "Duşmannen işdeşlik faaliyeti" maddesine istinaden; 1-i — 111-nci "Devlet hainligi" maddesine istinaden; 3-ü — Ukrayina Ceza qanunnamesiniñ 438-nci "Cenk cinayetleri" maddesine istinaden", — dep beyanatta qayd etildi.
Hatırlatamız ki, oraq ayınıñ 16-nda prokurorlıq bildirdi ki, Qırım Muhtar Cumhuriyeti Apellâtsiya mahkemesiniñ sabıq mahkemecisi devlet hainligi içün 13 yılğa ğıyabiy şekilde mahküm etildi. Yarımada işğal etilgen soñ işğalli akimiyetniñ hızmetine keçti ve şimdi Rusiye kontrolindeki Qırım Cumhuriyetiniñ Yuqarı mahkemesinde çalışa.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
