Rusiye Devlet duması VPN reklaması ve "aşırıcı" malümatnı tapmaq içün cezalarnı belgileycek qanun qabul etti. Qanun qaideleri işğal etilgen topraqlarda, hususan, Qırımda da çalışacaq.
RİA "Novosti Krım" bunı bildirdi.
Qanun, Vladimir Putin tarafından imzalanğan soñ, 2025 senesi ilk küz ayınıñ 1-nde küçke kirecek.
"Aşırıcı" malümatnı qıdıruv içün 3 biñden 5 biñ rublege (900-1500 ğrıvnâ) qadar para cezası berilecek.
Aşırıcı olaraq, hususan, aşırıcı materiallar federal cedvelindeki edebiyat, saytlar, audio ve video, diniy ve milliy sebeplerden öldürüvlerni aqlağan neşirler, natsist Almaniyası ve faşist İtaliyasınıñ liderleriniñ eserleri sayıla, dep haberde qayd etildi.
İnstagram ve Facebook kibi blok etilgen resurslarğa irişmek içün VPN qullanuvı şimdilik para cezasını çekmey.
Qanun VPN-hızmetleriniñ reklaması içün de sanktsiyalar kirsete: fizikiy şahıslarğa 50 biñden 80 biñ rublege qadar (15-24 biñ ğrıvna), memurlarğa — 80 biñden 150 biñge qadar (24-45 biñ ğrıvna), uquqiy şahıslarğa ise — 200 biñden 500 biñge qadar (60-150 biñ ğrıvna) para cezası berilecek.
Hatırlatamız ki, Rusiye Devlet dumasınıñ haber siyaseti eyyetiniñ reisiniñ muavini Anton Gorelkin, VPN qullanuvı cinayet sayılmaycaq, dep bildirgen edi. Amma, "tahqiqat" onı qanunsız areketlerni gizlemek içün qullanğanını isbatlasa, bu ağır bir şey olur.
2025 senesi ilk yaz ayında "Sarı şerit" areketi, işğal etilgen Qırımda maliye müessiseleriniñ hadimlerini Max Rusiye messencerine keçmege mecbur eteler, dep bildirdi. Bu hızmet bütünley Rusiye akimiyetiniñ nezaretindedir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
