Çernivtsi şeeriniñ Şevçenko rayonı mahkemesi, evel Ukrayina temsilcisi olğan Simferopollı (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adli) qrossmeyster Serğiy Karâkinni, Ukrayina devletine qarşı silâlı istilâğa para masraf etkeni içün 9 yılğa mahküm etti.
Ukrayina havfsızlıq hızmetiniñ Çernivtsi vilâyetindeki idaresiniñ Facebook saifesinde bu aqqında haber etildi.
Tahqiqat, 2014 senesi adamnıñ Qırımnıñ işğaline qol tutqanını belgiledi. Rusiyeniñ Ukrayinağa tolu miqyaslı istilâsı başlanğan soñ o, işğalcilerniñ cinayetlerini aqladı, halqara auditoriyağa tesir etmege tırıştı, şu cümleden: "Rusiyeni toqtatmağa çağırğanlarnı körmek pek acayip" dep bildirdi.
Karâkin Telegram kanalında Rusiye arbiy hızmetçileri içün para toplay edi. UHHniñ malümatına köre, o, yüz millionlarnen rubleni RF arbiy bölükleri içün dronlarnı, issilik közlükleri, silâ ve donatmalarnı satın almaq içün qullandı.
Onıñ faaliyeti Ukrayina Ceza qanunnamesiniñ 110-2 maddesiniñ 4-nci qısmına istinaden devlet sıñırlarını zorbalıqnen deñiştirmege doğrultılğan areketlerni maliye etüv olaraq belgilene.
Hatırlatamız ki, kiçik aynıñ 24-nde Avropa Birligi işğal etilgen Qırımda eki "senator"ğa qarşı sanktsiyalarnı kirsetti: santıraççı, Simferopol (Aqmescit= sakini Serğiy Karâkin ve Rusiye Federatsiyasınıñ Ukrayinağa istilâsında iştirak etken Ukrayina Kirovoğrad vilâyetinden Yuriy Nimçenko. Olar Rusiyege qarşı sanktsiyalarnıñ 16-ncı paketine kirdiler.
Qırım MC ve Sevastopol (Aqyar) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
