Avropa Birligi kiçik aynıñ 24-nde işğal etilgen Qırımda eki "senator"ğa qarşı sanktsiyalar kirsetti: santıraççı, Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakini Sergey Karâkin ve Ukrainağa Rusiye Federatsiyasınıñ istilâsında iştirak etken Kirovograd vilâyetinden Yuriy Nimçenko. Olar Rusiyege qarşı sanktsiyalarnıñ 16-ncı paketine kirdiler.
Bunı AB matbuat hızmeti bildirdi.
Sergey Karâkin
"Bundan evel o, santıraç ustası edi, ve Rusiyeniñ Ukrainağa qarşı istilâcı cenkine qol tutqanı içün onı işten boşattılar. O, cenkke qoltutmağa devam etti, Rusiye tarafından işğal etilgen Ukraina topraqlarını ziyaret eterek ve Rusiye Silâlı quvetlerine destek içün arbiy yüklerni toplayaraq, şu cümleden prezident Vladimir Putinge (Rusiye diktatorına — muar.) açıq mektübini derc etti,", — dep aytıla Avropa Birliginiñ beyanatında.
Karâkin 1990 senesi Qırımda Simferopolda (Aqmescitte) doğdı. 2009 senesi sport vatandaşlığını Rusiye vatandaşlığına deñiştirdi, 2014 senesinden başlap açıqtan-açıq tecavuziy cenkke çağıra, Rusiye Federatsiyasınıñ Ukrainağa qarşı silâlı tecavuzını aqlay ve qanuniy olaraq tanıy.
Guinness Rekordları Kitabına eñ yaş (o vaqıt) halqara grossmeyster olaraq kirdi — bu sport unvanını 12 yaşında ve 211 künde elde etti.
2018 ve 2024 seneleri saylavlarda Putinniñ işançlı adamı.
2022 senesi saban ayında FİDE (Halqara şantıraç federatsiyası) Karâkinni yarım yılğa diskvalifikatsiya etti, lâkin sanktsiyalarnı uzatmadı.
2022 senesi orta küz ayınıñ 19-nda Ukraina sanktsiya cedveline kirsetildi. 2025 senesi qara qış ayınıñ 19-nda bütün devlet mukâfatlarından marum etildi, maliye sıñırlavları qoyulğan sanktsiyağa oğrağan şahıslar cedveline kirsetildi.
Yuriy Nimçenko
Ukrainanıñ Kirovoğrad vilâyetinde doğdı, Qırımda yaşadı. Traktorcı olıp çalıştı, soñra USQne tankçı olıp ketti.
2014 senesi yarımadanıñ işğali vaqtında istilâcı memleketniñ tarafını tuttı. Rusiye Qara deñiz flotunıñ 126-ncı yalı mudafaası brigadasında hızmet etti. Bundan da ğayrı, Ukrainanıñ Rusiye tarafından işğal etilmesinde iştirak etti.
2022 senesi saban ayında Putin oña "Rusiye qaramanı" unvanını berdi. Rusiye akimiyeti, Nimçenkonıñ tank erkânı 2022 senesi kiçik ayda Şimaliy Qırım kanalınıñ barajında keçitni "toqtattı", dep iddia ete. Amma tam olaraq ne yerde olğanını aytmay.
Qırım "senatorları" Nimçenko ve Karâkin, Putinniñ 2024 senesi prezident saylav kampaniyasında işançlı şahısları edi.
Hatırlatamız ki, kiçik aynıñ 24-nde Avropa Birligi Şurası Rusiyege qarşı sanktsiyalarnıñ 16-ncı paketini qabul etti.
Telegram, WhatsApp ve Facebookta Suspilne Qırım haberlerine abune oluñız
