Kremlniñ sabıq eseri, serbest jurnalist Vladıslav Yesıpenko, Qırım işğalcileri tarafından "devlet hainligi" ve "casuslıq" sebebinden 12 yılğa mahküm etilgen Qırım sakini Ğalına Dovğopolağa açıq mektüpni derc etti.
Yesıpenkonıñ mektübiniñ tolu metnini "Qırım.Aqiqat" neşiri derc etti.
Mektüpte sabıq siyasiy mabüs, beraber izolâtorda keçken künlerni hatırlay.
"Selâm, Qardaşım! Men bellesem, seni böyle adlandıra bilem, çünki Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) SİZOsınıñ qomşu kameralarında oturğanda biz bir-birimizge qol tutıp, küreşken ve ğalebege işanğan edik", — dep qayd etti o.
Yesıpenko, olar açıq "yemlik" vastasınen qonuşqanlarını, işğalda ayat, balalar ve Ukrayinanıñ kelecegi aqqında laf etkenlerini tarif ete.
Onıñ aytqanına köre, Ğalına eñ ağır şaraitte bile mizahını saqlap qala edi — "qamaçavda olğan qıyınlıqlar aqqında tek sizge has tebessümnen ayta edi".
Jurnalist, Moskvanıñ Lefortovo SİZOsında qadınnıñ uyqusı ve tütünden marum etilgenini hatırlay ve o, "yağbezlerni içe edi". O, onıñ küçüne diqqat etti:
"Aqlında tutam, qısqa bir müddet içinde seni söznen cinaiy akimiyetniñ yerine qoydıñ, bundan soñ erkek ve qadın SİZO bölükleri seni tek adıñnen ve babañnıñ adınen çağırıp başladılar".
Ğalına 70 yıllığını apishanede qayd etti. Yesıpenkonıñ qayd etkenine köre, Rusiye qanunlarına köre, onı tek 76 yaşında azat ete bileler — "ve apis cezaları ceetinden bu "iç bir vaqıt" demektir.
Jurnalistniñ fikirince, cemiyet mabüsniñ azat etilmesi içün küreşmege devam etmeli.
"Apishanede sağlığıñ pek fenalaşqanı belli, amma Ukrayinağa olğan inancıñ öyle de degil. Bacım, bil ki, men ve bir çoq qayğırğan insan seniñ ve azat etilüviniñ oğrunda küreşemiz! Seni Ukrayina toprağında canlı körmege ümüt etem!" — dep qayd etti o.
Yesıpenkonıñ mektübi Dovğopolanıñ Simferopol (Aqmescit) SİZOsında yazğan sözlerinen yekünlendi:
"Er kesten bir şey rica etem: menim içün para toplamañız! Yardım — tek keniş tarqalmaq ve Ukrayina ükümetine siyasiy mabüslerni "qamaçav" altında tutmamağa hatırlatmaq. Biz ise mında bekleymiz, ve er birimiz yaşamaq içün küreşemiz, "Rusiyede ölüm" olsa bile, tikenli telden. Bizni unutmamañıznı rica etemiz!.."
Hatırlatamız ki, RF SİZO ve müstemlekelerinde eñ az 25 Qırım siyasiy mabüsini tuta, dep Qırımtatar maaliy merkezi haber etti. Olarnıñ arasında Ğalına Dovğopola da bar.
Siyasiy mabüsniñ "davası" aqqında tafsilâtlıca daa evel Suspilne Qırım jurnalistleri uquq qorçalayıcılarnıñ ikâyelerinden ve onıñ mektüplerinden ögrengen ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
