Novoçeboksarsk şeerindeki 3-nci müstemlekege etap etilgen soñ, Qırım siyasiy mabüsi Arsen Abhayirovnıñ sağlıq vaziyeti fenalaştı. Mahküm etilgenniñ qan damarlarınen ciddiy meseleleri bar ve tişleri bozulğan, müstemlekede tedaviylenmesi irilişmez.
Keçenlerde aqayını ziyaret etken Azize Abhayirova "Qırım birdemligi"ne bunı bildirdi.
Onıñ aytqanına köre, aqayınıñ eski varikoz hastalığı acele tibbiy yardımnı talap ete, amma müstemlekede kerekli tedaviylev irişilmez.
"Onı raatsızlağan varikoz hastalığı quvetleşti. Ve elbette ki, [müstemlekede] kerekli tedaviylev yoq. Onıñ şaraitinde kerekli tişçilik tedaviylevini keçirmege imkân yoq", — dep Azize Abhayirova qayd etti.
Arsen Abhayirov müstemlekede 13 yılğa üküm etildi. 2024 senesi çiçek ayında Çuvaş Cumhuriyetine avuştırıldı. Bundan evel o, Qırımdan 7 biñ kilometr uzaqlıqta olğan Ulan-Udedeki (Burât Ulusı) 8-nci müstemlekede bulunğan edi. Evelleri — Krasnoyarsk vilâyetiniñ Yeniseysk apishanesinde. Novoçeboksarsk da uzaq olsa da, ailesi onıñ daa irişilir olğanını tüşüne.
"Bizim içün eki biñ kilometrlik yol, bir qaç yıl evelsi beş buçuq biñ kilometrlik yolnen kelgenimiz Krasnoyarskqa nisbeten, endi yaqın körüne edi", — dep siyasiy mabüsniñ apayı añlattı.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
