Rusiye tarafından "terrorizm" içün 13 yılğa üküm etilgen "Hizb ut-Tahrir davası"nıñ Krasnogvardiysk (Qurman) gruppasınıñ mabüsi Arsen Abhayirovnı Burât Ulusındaki Ulan-Udeniñ 8-nci apishanesinden Qırımğa yaqın bir yerge avuştırdılar. O, Çuvaşistan müstemlekesinde buluna.
Çiçek ayınıñ 21-nde onıñ apayı Azize Abhayirova "Qırım birdemligi" cemaat teşkilâtına bunı bildirdi.
Onıñ aytqanına köre, saban ayınıñ 4-nde Qırımtatar Burât Ulusından ketti. O, aman-aman bir buçuq ay yolculıqta edi.
"2025 senesi çiçek ayınıñ 17-nde o, Tsivilsk şeeriniñ SİZO-2ne keldi. 15 daqqağa maña resmiy bağnen telefon ete edi. O, onı Çuvaşiya Cumhuriyetiniñ TM-3ke "böldiler", dep ayttı", — dep Abhayirova qayd etti.
Keçken seneniñ qara qış ayından berli siyasiy mabüs tuvğan Qırımdan 7 biñ km uzaqlıqta olğan Ulan-Ude şeerindeki TM-8de buluna edi. İşğalli mahkeme onıñ evine yaqınlaştırılması boyunca davasını eki kere baqtı.
Adamnıñ şimdi bulunğanı Çuvaşistandaki apishane Qırımdan 2 biñ kilometr uzaqta yerleşe.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
