Rusiye akimiyeti tarafından 17 yılğa üküm etilgen imam Raif Fevziyev apiske alınğanından berli ilk sefer balalarını: 17 yaşındaki Abdullah, 14 yaşındaki İsmail ve 10 yaşındaki Deryanı kördi. Bundan da ğayrı, Krasnoyarsk vilâyetiniñ Yeniseysk müstemlekesinde apayı onı körmege keldi. Aile ilk yaz ayınıñ 16-nda, Fevziyevniñ doğğan künü birleşti.
Onıñ ömür arqadaşı Liana Fevziyeva içtimaiy ağlarda bunı bildirdi, dep ilk yaz ayınıñ 30-nda "Qırım birdemligi" cemaat teşkilâtı haber berdi.
Onıñ aytqanına köre, aqayı, balalarınıñ ne qadar deñişkenlerini körgeninden duyğusal sürette şaşmaladı, ve "bahtlı közyaşları" çoq edi.
"Raif şokqa oğradı. Soñra aytqanı kibi, o azırlana edi, balalar büyügenlerini ve deñişkenlerini añlay edi. Oğlanlar onıñ boyu edi, qızı ise, qollarında taşığan bala yerine, aman-aman köküsleri boyunda edi. Bu onı ayrette qaldırdı, buña azırlanmaq mümkün degil", — dep Fevziyeva tarif etti.
Uzun müddetli körüşüv içün izin kiçik ayda alındı, lâkin yolculıq sert ava şaraiti ve 5500 km-den çoq mesafe sebebinden üç kere başqa künge qaldırıldı.
"Maliyeviy masraflar, Sibirniñ sert suvuqlarından qorqu, uzaq mesafe ve yolnıñ qıyınlığı bizni bu yolculıqnı yapıp olamaycağımıznı tüşünmege mecbur etti", — dep siyasiy mabüsniñ apayı qayd etti.
O şunı da qoştı ki, Raif "zulum astında" degil edi, amma saçlarınıñ aman-aman üçte biri ağardı.
"Hizb ut-Tahrir davası"nıñ dörtünci Aqmescit gruppası aqqında ne bilemiz
2021 senesi arman ayınıñ 17-nde FSB musulman ve qırımtatarlarnıñ evlerini kütleviy şeklde tintti.
Tintüvlerden soñ işğalli quvetçiler beş insannı "terror teşkilâtınıñ faaliyetinde iştirak etüv"de qabaatlap yaqaladılar (Rusiye Ceza qanunnamesiniñ 205.5-nci maddesi). Aqyarnıñ (Sevastopolnıñ) Nahimov rayonında — faalci Rustem Murasov ve Rustem Tairov, Aqyarnıñ Balıqlava rayonında — Cebbar Bekirov, Bağçasaray rayonında — faalci Zavur Abdullayev, Aqmescit (Simferopol) rayonında — Raif Fevziyev.
2023 senesi qara qış ayınıñ 12-nde Rostov-na-Donu Cenübiy bölgeniñ arbiy makemesi Raif Fevziyevni 17 senege maküm etti. Daa soñra Vlasiha şeeriniñ Apellâtsiya arbiy makemesi ükümni deñiştirmedi.
Daa soñra, 2022 senesi kiçik aydan başlap, bu dörtünci Aqmescit gruppasına daa bir iştirakçi — Amethan Abdulvapov qoşuldı. Qırımtatar, sert rejimli müstemlekede 10,5 senege üküm etildi, soñra ise üküm deñiştirilmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
