Qırım siyasiy mabüsi Raif Fevziyevanıñ ömür arqadaşı aqayını dört yıldan soñ birinci kere kördi. Körüşüv, kiraz aynıñ 14 künü Krasnoyarsk vilâyetindeki 6-ncı Yenisey müstemlekesinde olıp keçti, şimdi Fevziyev anda tutulmaqta.
Bu aqta Qırımtatar resurs merkezi, Liana Fevziyevağa esaslanıp bildire.
O, ağır yolğa baqmadan, körüşüv, ekisi içün de müim vaqia olğanını ayta.
Ömür arqadaşı aytqanına köre, Raif Fevziyevniñ sağlığı bayağı zayıflaştı. Onıñ ayaqlarında varikoznıñ ağırlaşmalarından peyda olğan meseleleri bar.
"Varikoz evelkisinden çoq beter oldı. Bu pek qorqunçlı – ayaqları deşetli vaziyette, ve olar onı çoq raatsızlaylar. Basqısı da köterile", – dedi Fevziyeva.
Liana Fevziyeva apishanede aşayt malları bayağı bozulğanını ayta. Gastroenterologik meseleler qısmen çetke çekilse de, sağlıqnıñ umumiy alı raatsızlay.
6-ncı Yenisey müstemlekesi, Rusiyeniñ CİFHCezalarnıñ İcra etüviniñ Federal Hızmeti sistemasında eñ qattı müessiselerden biridir, dey Fevziyeva.
"O, körüşüvden büyük stress alğan, amma men mektüplerden duyğanım kibi, aksine, bu oña küç ve ümüt bağışladı", — dep qoştı Liana Fevziyeva.
Onıñ aytqanına köre, erkek tışqı dünyadan deyerlik ayrı qalğan, çünki onıñ alâqaları tek odadaşları ve qaravullarnen sıñırlana. Müstemlekede iş yoq, şunıñ içün mabüsler vaqıtnıñ çoqusını kameralarda keçireler.
Hatırlatamız, Raif Fevziyev 2021 senesi arman aynıñ 17-de "Hizb-ut-Tahrir" islâm siyasiy teşkilâtında iştirak etmekte qabaatlanıp, yaqalandı ve 17 yılğa mahküm etildi.
"Hizb ut-Tahrir davası"nıñ dörtünci Aqmescit gruppası aqqında ne bilemiz
2021 senesi arman ayınıñ 17-nde FSB musulman ve qırımtatarlarnıñ evlerini kütleviy şeklde tintti.
Tintüvlerden soñ işğalli quvetçiler beş insannı "terror teşkilâtınıñ faaliyetinde iştirak etüv"de qabaatlap yaqaladılar (Rusiye Ceza qanunnamesiniñ 205.5-nci maddesi). Aqyarnıñ (Sevastopolnıñ) Nahimov rayonında — faalci Rustem Murasov ve Rustem Tairov, Aqyarnıñ Balıqlava rayonında — Cebbar Bekirov, Bağçasaray rayonında — faalci Zavur Abdullayev, Aqmescit (Simferopol) rayonında — Raif Fevziyev.
2023 senesi qara qış ayınıñ 12-nde Rostov-na-Donu Cenübiy bölgeniñ arbiy makemesi Raif Fevziyevni 17 senege maküm etti. Daa soñra Vlasiha şeeriniñ Apellâtsiya arbiy makemesi ükümni deñiştirmedi.
Daa soñra, 2022 senesi kiçik aydan başlap, bu dörtünci Aqmescit gruppasına daa bir iştirakçi — Amethan Abdulvapov qoşuldı. Qırımtatar, sert rejimli müstemlekede 10,5 senege üküm etildi, soñra ise üküm deñiştirilmedi.
Telegram, WhatsApp, Facebook ve YouTube-ta Suspilne Qırım haberlerine abune oluñız
