İşğal etilgen Qırımnıñ Saq şeerindeki arbiy ava limanı yanında Rusiye arbiyleri cep telefonları bağını söndürmege başladılar. Soñki vaqıtları bu obyektke qoşma donatmalar, şu cümleden ava mudafaası vastaları ve yaqarlıq konteynerleri qoyuldı.
Saqta faaliyet köstergen "Ateş" arbiy-partizan areketiniñ agentleri bunı bildirdiler.
Saq şeerinde işğalciler uçaq ava limanına ücümden qorqıp, cep telefonları bağını söndüreler.
"Böyle faaliyetniñ sebebi — Ukrayina mudafaa quvetleri tarafından ola bilecek ücümlerden qorqu. Saq şeerindeki ava limanı işğal etilgen yarımadada duşman aviatsiyası ve tehnikasını yerleştirmek içün esas obyektlerden biri edi ve öyle de olıp qala", — dep areket koordinatorları añlattılar.
Faalcilerniñ qayd etkenlerine köre, işğalciler cep telefonları bağını sıñırlap, arbiy tehnikalarınıñ areketleri ve yerleştirilüvi aqqında malümatnı bermemege ve bu yerde Rusiye ordusınıñ faaliyetini gizlemege tırışalar.
Hatırlatamız ki, evel "Ateş" Balıqlava körfezinde eski terk etilgen suvastı qayıqlar bazasında işğalcilerniñ faalleşkenini iddia etti. Olarnıñ malümatına köre, obyektni silâ saqlamaq içün sığınacaq, deñiz dronlarını tezden deñiştirmek ya da qorulğan komandanlıq noqtası kibi qullanmaq mümkün.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
