"ATEŞ" arbiy-partizan areketiniñ agentleri Qırımdaki arbiy obyektte – Balaklava köyündeki sabıq taşlanğan suv astı bazasında işğalcilerniñ faalleşkeni aqqında haber eteler.
Bu aqta areket Telegram-da haber ete.
"Bizim malümatımızğa köre, obyektni cenk silâlarını saqlamaq içün arbiy yedeklerni, deñiz dronlarını tez köçürmek içün ya da qorçalanğan komandalıq noqtası olaraq qullanmaq mümkün. Koordinatlar: 44.50346, 33.59788", – denile beyanatta.
Areketniñ partizanlarınıñ aytqanlarına köre, işğalciler yaqında Sevastopoldeki (Aqyar) Balaklava (Balıqlava) köyüniñ yalı boyu yerinde taşlanğan binalarnı yıqtılar. Şuralar devirinde mında gizli yerastı suv astı bazası – "Obyekt 825 GTS" çalışqan edi. Baza, yader ücümine qarşı turmaq qabiliyetini esaplap quruldı.
"Yalı boyu zonasındaki taşlanğan binalarnı yaqında yıqqanlar neticesinde şuralar devrinde torpedalar ve raketalar yüklengen ve boşatılğan tonnelniñ kirişiniñ doğrudan-doğru manzarası açıldı. Şimdiki vaqıtqa qadar yer astı qurulışına kiriş serbest, etraf temizlengen – bu obyektniñ tekrar qullanuvğa azırlanması mümkün olğanını köstere bile", – haber eteler "Ateş"-te.
Hatırlatamız, bir kün evel "ATEŞ", Herson vilâyetiniñ işğal etilgen qısmında ve Qırımda Rusiye ava mudafaasınıñ areketi aqqında haber etti.
Telegram, WhatsApp, Facebook ve YouTube-ta Suspilne Qırım haberlerine abune oluñız
