İşğalli Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayon mahkemesi, 2025 senesi kiçik aynıñ 5-nde işğal etilgen Qırımnıñ Canköy rayonında keçirilgen kütleviy tintüvlerden soñ FSB tarafından tutulğan dört qırımtatar içün tevqif tedbirini uzattırdı. Olarnı Rusiyede yasaq etilgen "Hizb ut-Tahrir" islâm siyasiy teşkilâtında iştirak etkeninde qabaatladılar.
"Qırım birdemligi" bu aqqında yazdı.
Rustem Mustafayev, Abibullah Smedlâyev, Emir Kürtnezirov ve Mirzali Tacıbayev eñ azından 2025 senesi orta küz ayınıñ 4-ne qadar Simferopolnıñ (Aqmescitniñ) 2-nci SİZOda qalacaqlar.
Advokat Edem Semedlâyev bildirdi ki, tahqiqatnıñ versiyasına köre, apis müddetiniñ uzatılmasınıñ sebebi — "tahqiqat işleri bitirilmegeni", em de — qaçuv ya da şaatlarğa tesir etüv telükesi olğanı oldı. Qabaatlanğanlar ve olarnıñ qorçalayıcıları apis müddetiniñ uzatılmasına qarşı çıqalar ve apiske alınğanlarnıñ içtimaiy alâqaları tek Qırımda olğanını qayd eteler.
"Tahqiqatçı bu muracaatnı (tevqfniñ uzatılması aqqında) tahqiqat tedbirleri bitmegenine esaslandıra, bir sıra tedbirler keçirilmeli — qabaatlanğanlarnı ekspertizalar, cinaiy dava malümatlarınen tanış etmek ve bu cinaiy davanı bitirmek kerek", — dep advokat Edem Semedlâyev tarif etti.
"Qırım birdemligi"niñ malümatına köre, mahkeme qararında davanıñ açıq baqıluvı aqqında aytılsa da, ne diñleyiciler, ne de soy-sopları mahkemege kirsetildi.
Hatırlatamız ki, beş qırımtatar — Rustem Mustafayev, Bahtiyar Ablayev, Mirzali Tacıbayev, Abibullah Smedlâyev ve Emir Kurtnezirovnıñ evleri 2025 senesi kiçik aynıñ 5-nde tintildi. Aynı şu künü olardan üçü Simferopolnıñ (Aqmescitniñ) 2-nci SİZOğa yollanıldı, ertesi künü Mirzali Tacibayev ve Bahtiyar Ablayev o yerge ketirildi. Olarnıñ episi Lobanovo köyündeki caminiñ ziyaretçileri edi ve onıñ toprağında tamir işlerinde iştirak ete ediler. FSB olarnı Rusiyede yasaq etilgen teşkilâtta iştirak etüvde qabaatladı.
Tutulğanlarnıñ soy-sopları FSB tarafından bozuvlar yapılğanını bildirdiler: insanlarğa protokollarnıñ kopiyasını bermediler, evlerge ise, olarnıñ aytqanına köre, yasaq etilgen kitaplar qoyuldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
