İşğal etilgen Qırımdan Ukrayinanıñ kontrolindeki topraqlarda yerleşken aliy oquv yurtlarına kirgen abituriyentlerniñ sayısı tolu miqyaslı istilâdan soñ eksildi. 2022 senesine qadar yarımadadan orta esapnen 400 kişi kelgen olsa, 2024 senesi ise 57 kişi.
"Crimea Vox" canlı yayınında prezidentniñ Qırımdaki daimiy temsilcisi Olğa Kurışko bu aqqında tarif etti.
Onıñ aytqanına köre, bir qaç sebebi bar. Olardan biri — yol qıyınlığı.
''Yazıq ki, er kes kelmey, çünki tolu miqyaslı istilâdan soñ vaziyet bütünley deñişti. İşğal etilgen Qırım toprağından Herson vilâyetinen memuriy sıñırdan keçmek mümkün olsa edi de, şimdilik bu imkân yoq. Ukrayinanıñ nezaretindeki topraqlarğa barmaq içün, çetel memleketlerden yetişken birisinen beraber ketmek kerek. Bu bayağı vaqıt ve para talap ete edi. Şunıñ içün muracaat seviyesi kerçek kiriş sayısına uymay", — dedi o.
Bundan ğayrı, Olğa Kurışkonıñ aytqanına köre, Qırım abituriyentlerinen kommunikatsiyanıñ sistematik usullarını qurmaq kerek.
Hatırlatamız ki, ilk yaz ayınıñ 1-nde işğal etilgen topraqlardan qıtaiy Ukrayinağa kelgen abituriyentler içün aliy oquv yurtlarına kiriş kampaniyası başlandı. O, ilk küz ayınıñ 30-na qadar devam etecek, olar ukrayin aliy oquv yurtlarına sadeleştirilgen ceryan boyunca kire bileler — NMT ve ukrayin vesiqaları olmadan.
Prezidentniñ Qırımdaki temsilciliginiñ malümatına köre, 2025 senesiniñ birinci yarısında işğal etilgen yarımadadan tasil, vesiqalarnıñ tanılması, ukrayin mekteplerine oqumağa kirüv ve kiriş kampaniyasında iştirak etüv meseleleri boyunca 75 muracaat keldi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
