İşğalciler Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakinini devlet hainliginde qabaatlap, 17 yılğa qadar apis cezasına mahküm ettiler. Rusiye kontrolindeki tahqiqatnıñ malümatına köre, o, Baş istihbarat idaresinen işbirlik tuttı ve onıñ vazifesi olaraq işğal etilgen Qırımda arbiy vertolötnı patlatmağa tırıştı.
İşğalli Qırımdaki FSBge atfı etip, RİA "Novosti Krım" bu aqqında haber etti.
"Bİİniñ vazifesine binaen, adam bombalarnı ve patlayıcı aletlerni çıqardı: 2 kg ağırlığında ecnebiy brizant esasında yapılğan plastik patlayıcı, elektrodetonator ve elektrik ateşleyicisi. Bu komponentlerden o, öz başına patlav cihazını azırlap, Rusiye Mudafaa nazirliginiñ Sevastopol şeerindeki ava limanlarından birinde arbiy vertolötnı urıp tüşürmek kerek edi", — dep aytıla haberde.
Hatırlatamız ki, Rusiye FSBsi işğal etilgen Qırımnıñ 22 yaşındaki sakinini "devlet hainligi"nde qabaatladı. Keriç sakini "UMNniñ Bİİ içün casuslıq yapqanı"nda şübheli sayıla.
Daa evel Avropa insan aqları mahkemesi Rusiyeni söz serbestliginiñ sistematik basqısı ve Ukrayinağa qarşı cenkni tenqit etkeni içün insanlarnıñ taqip etilmesinde qabaatlı tanıdı. Avropa insan aqları mahkemesi ayrı qayd etti ki, Qırımdaki işğalli mahkemelerniñ bütün "qararları" qanunsızdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
