Bozarğan aynıñ 16-nda Kıyivniñ merkezindeki Baş poçta binasında "Artek. 100 yıl" yañı mektep pulu taqdim etildi.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
Bozarğan aynıñ 16-ndan başlap bu bala lageriniñ mütenasip poçta pulları ve resmiy zarfları onlayn ve oflayn satın alına.
"2014 senesinden başlap, Kıyiv vilâyetinde "Artek"ni 70 biñ bala ziyaret etti, şimdi ise nevbette tahminen 1 300 insan buluna. Lagerdeki taqım, balalar etrafta olğan cenkni sezmesinler dep, er şeyni yapa", — dep lagerniñ baş müdiri Serğiy Kapustin bildirdi.
Yañı mektep pullarınıñ dizaynını ressam Orına Kamarali yaptı. Temsilcilikniñ bildirgenine köre, o, 2014 senesi Rusiye işğalinden evel Qırımdaki bu lagerde olğan balalarnen bağlı keyfiyetni, balalıqnıñ aydın obrazlarını köstermege istedi.
Tedbirde prezidentniñ daimiy temsilcisi Olğa Kurışko da iştirak etti.
Hatırlatamız ki, "Qırım tarihında bu kün" yañı rubrikasında Suspilne 100 yıl evel "Artek" bala şifahane lageriniñ qurulması, mustaqil Ukrayina vaqtında onıñ şekillenmesi ve inkişafı, yarımada işğalinden soñ oña ne olğanını tarif ete.
İşğal etilgen Qırımda "Artek" sanktsiya lageri aqqında ne bilemiz
Qırım işğal etilgen soñ Rusiye akimiyeti "Artek" bala merkezini "milliyleştirdi", soñra mülküni Rusiyege berdi.
Ukrayina Tış işler nazirligi UNESCO, halqara teşkilâtlar ve dünya toplulığını "Artek"niñ Rusiye Federatsiyasına berilmesini takbih etmege çağırdı. Nazirlik qayd etti ki, 2006 senesi Ukrayina ükümeti ve UNESCO arasında "Artek" halqara bala merkezi" Ukrayina devlet müessisesi içün UNESCO imayesi altında merkez statusınıñ berilmesi aqqında añlaşma imzalandı.
QMC prokurorlığı 2015 senesi çiçek ayında işğal etilgen Qırımda "Artek" şirketiniñ "milliyleştirilüvi" sebebinden cinaiy dava açtı. 2016 senesi çiçek ayında Kıyivniñ Obolon mahkemesi "Artek" mülküni tevqif etti. Qırım işğal etilgen soñ "Artek" Ukrayina qıtaiy qısmına köçti ve Kıyiv civarındaki Puşça-Vodıtsâda bulundı. Rusiyeniñ Ukrayinağa istilâsı başlağanından berli müessise Kıyiv vilâyetinden Zakarpattâğa tahliye etildi.
Avropa Birligi yarımada işğal etilgen soñ Rusiye Federatsiyasınıñ Tasil nazirliginiñ nezareti altında bulunğan "Artek" lageri içün sanktsiyalar kirsetti.
2023 senesi arman ayında AQŞ Ukrayinadan balalarnı zorbalıqnen alıp ketken Rusiyeden bir sıra uquqiy ve fizikiy şahıslarğa qarşı sanktsiyalar kirsetti. Cedvelge Rusiyeniñ "Artek" Halqara bala merkezi" Federal devlet bücet tasil müessisesi de kirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
