Qırım siyasiy mabüsi Oleksandr Sizikov Rusiye apishanesinden "mahkeme sistemasınıñ adalet bayramı" sebebinden degil de, başta kimse diqqat ayırmağan hastalığı sebebinden azat etildi.
"Qırım birdemligi"niñ advokatı Emil Kurbedinov bunı bildirdi.
"O, mahkeme sisteması adaletiniñ ğalebesi sayesinde çıqmadı — oña kimse afu soramadı, reabilitatsiya olmadı, uzun aylarnen etaplarda, izolâtorlarda, müstemlekede keçirdi. Çıqtı, çünki körüv qabiliyetini bütünley ğayıp etken insanlarnı müstemlekede tutıp olamaylar. Mahkeme bu meseleniñ cevabını bermedi. Ve FCHFederal Cezalandıruv Hızmeti bu meseleni birden çezmedi, Oleksandrnı izolâtorlarda ve sert rejimli müstemlekege ketirgenine qadar etaplarda tuttı", — dep Emil Kurbedinov qayd etti.
O şunı da qoştı ki, siyasiy mabüsler Rusiye müstemlekelerinden hastalıqları sebebinden degil de, lâğu etilgen ükümleri sebebinden azat etilecek vaqıt kelecegine inana.
"O vaqıt siyasiy mabüslerge azatlıq berilecek, advokatlarğa ise — "çalınğan" mahkeme ükümleri berilecek", — dep advokat tüşüne.
Hatırlatamız ki, Krasnoyarsk vilâyetiniñ Minusinsk şeer mahkemesi 39 yaşında Qırım siyasiy mabüsi Oleksandr Sizikovnı azat etti. Sekiz aydır apishanede yatqan SİZOda birinci sınıf körüv bozuqlığı olğan adamnı apishanege aldılar.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
