Rusiyede 17 yılğa üküm etilgen kör Qırım musulmanı Oleksandr Sizikovnı Krasnoyarsk vilâyetiniñ Minusinskiy şeerinde apishanege yolladılar. Qırımdan etap eki ay devam etti.
"Qırım birdemligi"ne onıñ anası Olena Sizikova bunı bildirdi.
Kiçik aynıñ 24-nde jurnalistlerge yazğan mektübinde Sizikov, onı kiçik aynıñ 8-nde apishanege ketirgenlerini ve bu etap eki ay devam etkenini tarif etti.
Şimdi o, dört diger mabüsnen beraber "karantin" kamerasında buluna. Onıñ aytqanına köre, zindandaşları yahşı davranıp, oña ev işlerinde yardım eteler.
Müstemlekege kelgende, adamnı saba sportından boşatqanlar, oña yataq rejimini ve mahsus diyetanı tayin etkenler.
"Umumen, er şey yahşı, Allahqa şükür. Kameranıñ arareti orta: menim ne sıcaq, ne de suvuqım bar. Bu yerge kelgen soñ, bütün eşyalarımnı "baul" odasına alıp kettiler, yalıñız gigiyena aletlerim, ofis malzemelerim, Brayl kitapçığım ve santraç oyunlarım qaldı. Ekimlerniñ mahsus bildirüvini ketirdiler — kamerağa tayaq, tonometr ve bazı ilâclarnı kirsetmege izin berdiler. İlâclar bitken soñ, maña başqalarını bereler", — dep Sizikov qayd etti.
Sizikovnıñ aytqanına köre, tibbiy baqıluvdan soñ onı müstemleke hastahanesine yollaycaqlar, anda oña er kün almaq kerek olğan gipertenziya içün ilâclar berecekler. Amma tam olaraq ne vaqıt olacağı belli degil.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
Telegram, WhatsApp ve Facebookta Suspilne Qırım haberlerine abune oluñız
