Rusiye akimiyeti tarafından 20 yılğa mahküm etilgen 49 yaşındaki Qırımtatar faalcisi Ansar Osmanovnı Vladimirniñ 2-nci apishanesine etap ettiler.
Onıñ apayı Meryem Osmanova "Qırım birdemligi"ne bunı bildirdi.
Onıñ aytqanına köre, aqayından ilk mektübini köçürilgeninden üç afta keçken soñ aldı, onıñ bulunğan yeri aqqında iç bir malümatı yoq edi.
"Çoq vaqıt devamında, çiçek ayınıñ 21-nden berli, bir şey olmadı. Men mektüp yazdım ve apishaneniñ hadimlerine telefon ettim, olar resmiy bir muracaat yolladılar. Anda onıñ nasıl olğanını bilmegenim içün yüregim yerinde degil edi", — dep Meryem Osmanova paylaştı.
Ansar Osmanov "Qırım birdemligi" areketiniñ faal iştirakçisi edi, Qırımda ve Rusiye toprağında Qırımtatarlarnıñ siyasiy taqip etilüvi boyunca mahkeme oturışlarına muntazam sürette qatnay edi.
Ansar Osmanov aqqında ne bilemiz
Apiske alınğanına qadar Ansar Osmanov ağaç ressamı olıp çalışqan edi. Şimdi onıñ beş balası babasız öse.
Kiçik aynıñ 9-nda saba Qırımnıñ bir qaç rayonında Qırımtatar faalcileriniñ evleri tintildi. Olarnı FSB hadimleri alıp bardılar. Bir qaç adam, şu cümleden Osmanov, yaqalandı ve Simferpol (Aqmescit) ve Sevastopoldaki (Aqyardaki) FSB idaresine ketirildi. Ansar Bağçasaray rayonınıñ Tankove (Büyük Süyren) köyündeki evinde keçirilgen tintüvden soñ yaqalandı.
Osmanov 2003 senesi, Ukrayina ve dünyanıñ diger memleketlerinde onıñ faaliyeti yasaq etilmegenine baqmadan, Rusiyede terroristik olaraq tanılğan "Hizb ut-Tahrir" islâm siyasiy firqasınıñ iştirakçisi olğanında qabaatlandı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
