18 mayıs künü saat 12:00-de qırımtatar halqınıñ sürgünliginde elâk olğanlarnı añmaq içün tınçlıq daqqası keçirilecek. 81 yıl evel şu künde Stalinniñ emiri ile şuralar akimiyeti, Qırımdan 200 biñden ziyade qırımtatarnı zornen sürgün etken.
Bunıñ aqqında Qırımda Ukraina prezidentiniñ temsilciligi bildirdi.
"Telükesiz quvetleri adamlarnı aşayt, suv ve tibbiy yardımsız yük vagonlarına yükley ediler. Çoqusı, yolda ocan bergen, başqaları sürgünlik şaraitlerine dayanıp olamadılar - olarnı hastalıqlar, açlıq, yorğunlıq öldürgen. Şuralar akimiyeti, halqnıñ medeniyetini, olarnıñ hatırasını, toprağındaki özgünligini yoq etmege tırıştı", – qayd ettiler temsilciliginde.
2015 senesi boş aynıñ 12-de Ukraina Yuqarı Şurası, sürgünlikni genotsid aktı adlap mayısnıñ 18-ci kününi Qırımtatar halqınıñ genotsid qurbanlarını añuv künü dep belgiledi.
"Sustırılğan tarih tekrarlana. Unutılğan cinayetlerniñ kene de olması mümkün. Bugün, Qırımnıñ yañı Rusiye işğali astında, qırımtatarlar kene de apiske alınuv, eziyetlev, horluq ve taqiplerni köreler. Bir daqqalıq tınçlıq – tek ölgenlerniñ canına ürmet işareti degil de, facianı yaşap olğanlarına ürmetiniñ kösterilmesidir. Bu dünyağa işaret: biz hatırlaymız. Bu daqqada tarihnıñ sesi daa küçlü eşitilsiñ dep er şey tınçlana. Bu tınçlıq, biñlernen viran etilgen qorantalar, coyulmağan ğayıplarnıñ adından laf ete. Çünki tarih tekrarlana", — qayd ettiler temsilciliginde.
Hatırlatamız ki, 18 mayıs künü Kiyevde hatırlav ve yardım meydanlığı açılacaq. Aqşam saat 20:00-ge qadar, Genotsid memorialında Hatırlav künü tedbirleri keçirilecek.
Telegram, WhatsApp ve Facebookta Suspilne Qırım haberlerine abune oluñız
