Rusiye işğalcileri tarafından 8,5 yılğa mahküm etilgen Ukrain siyasiy mabüsi Oleksiy Kıselöv Murmansk vilâyetindeki 17-nci apishanede qanunsız alda tutula. Adamnıñ sağlıq alı fenalaştı, onı sıq-sıq ceza izolâtorına yollaylar.
Suspilne Qırımğa siyasiy mabüsniñ oğlu Artem Kıselöv bunı bildirdi.
Onıñ aytqanına köre, babası "ağır sıñırlavlar qoyulğan gruppa"da buluna.
"Misal olaraq, er eki-üç saatte apishanede oturğan adam nevbette qayd etmek kerek ya da kamera ögüne çıqmaq kerek. Muhalifetniñ köküs işerti ve yataq tahtası diagonal olaraq qırmızı sızıqnen sızılacaq. Memuriyet mabüske qoşma diqqat köstermege qarar berse, onı gece de teşkermek içün kötere bilirler", — dep Artem Kıselöv qayd etti.
O şunı da ayttı ki, Oleksiy diger mabüslernen qonuşa ve olarnıñ siyasiy baqışlarını deñiştirmege tırışa — ve bu işte "bazı derecede becere".
"Babam, mabüsler çalışqan yerlerde çalışmağa red etkenini devam ete. Sağlığı pek yahşı degil. Murmanskta da küneş yoq, bu sebepten kemik ve buğum meseleleri başlandı. İş yapmaqtan vazgeçkeni içün babam bir ay devamında ceza izolâtorında buluna, anda bütün kün tura", — dep Artem Kıselöv qoştı.
Hatırlatamız ki, Oleksiy Kıselöv "Vladimir merkezi" sert rejimli müstemlekesinden Murmansk şeerindeki 17-nci müstemlekege avuştırıldı, yerli sakinler onı "Ugolki" dep adlay. O, Herson vilâyetiniñ Geniçesk şeerinden 3 800 km uzaqlıqta buluna.
Oleksiy Kıselöv aqqında ne bilemiz
2022 senesi oraq ayınıñ 22-nde Rusiye quvetçileri onı işğal etilgen Geniçeskte tuttılar, bundan soñ onı Qırımğa alıp kettiler ve SİZOda qapattılar.
Rusiye Cinayet qanunnamesiniñ 208-inci maddesiniñ 2-nci qısmına binaen Kıselöv, "Noman Çelebicihan adına batalyonda" iştirak etkeninde qabaatlandı. Bu teşkilât Rusiyede terroristik teşkilât olaraq tanıla. Rusiye prokurorlığı oña 10 senelik apis cezasını talap etti. Bundan da ğayrı, ukrainalı Qırımnıñ deñiz qamaçavında iştirak etkeninde qabaatlana.
Noman Çelebicihan batalyonınıñ tesisçisi Lenur İslâmov, Oleksiy Kıselövniñ oña alâqası bar olğanını red ete.
Kıselöv Geniçeskte olğan işkencelerni añlattı. Onı beş kün devamında qıynap, kamera qarşısında partizan areketiniñ yetekçisi olaraq itiraf etmesini talap ettiler.
2022 senesi orta küz ayınıñ 27-nde sabıq arbiy deñiz quvetleriniñ kapitanı, tutulğan kişiniñ ekim tarafından teşkerilmek ricalarına baqmadan, eki ay devamında tibbiy yardım kösterilmegeni sebebinden açlıq ilân etti. Bu eñ az altı halqara añlaşmanı boza.
2023 senesi kiçik aynıñ 17-de Canköyde işğalli makeme Kıselövni 8,5 sene sert rejimli müetemlekege üküm etti.
2023 senesi arman ayınıñ 22-nde Qırımnıñ işğalli İstinaf makemesi ükümni deñiştirmedi. İmayeci taraf qararğa şikâyet etmege planlaştıra.
2023 senesi orta küz ayınıñ 24-nde adamnı Rusiye Federatsiyasınıñ bşqa apishaneleri arasında eñ sert olğan "Vladimir merkezi" apishanesine etap ettiler. Şu sene boş ayda oña bir sene devamında ailesinden tek bir paket ve bir çanta almağa izin berdiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
