Bugünge qadar 52 genç Qırım sakini, işğalli Qırım akimiyeti tarafından siyasiy repressiyalarnıñ qurbanı oldı. Olarnıñ 32-si — tamır Qırımtatar halqınıñ vekilleridir. Bir qısmı SİZOda buluna, başqaları RFnıñ müsyemlekelerinde cezalarını çekeler.
Qırımtatar maaliy merkeziniñ (QMM) reisi ve Meclis azası Eskender Bariiev bunı bildirdi.
QMMniñ malümatına köre, 2025 senesi mayıs ayına qadar Qırım gençleriniñ siyasiy sebeplerden taqip etilüvi boyunca 52 adise qayd etildi, olardan 14-ü tahqiqat izolâtorında, daa 38-i — Rusiye Federatsiyasınıñ müstemlekelerinde buluna.
Qurbanlar arasında "terrorizm", "devlet hainligi", "Hizb ut-Tahrirde iştirak etüv" ya da "arbiy memuriyetlerniñ ateşke berüvi"nde qabaatlanğan Qırımtatarlar ve Ukrayinler bar.
"Yıldan-yılğa yarımadada cinayet işlegen gençlerniñ sayısı ep arta. Faal vatandaşlıq nazar noqtası içün gençler qorqunçlı repressiyalarğa oğraylar, ya da yarımadanı terk etip, serbest olmağan yerlerde bulunmamaq içün dünyanıñ farqlı memleketlerine ketmege mecbur olalar", — dep Eskender Bariiev qayd etti.
Yaqalanğanlarnıñ bazıları aylarnen habersiz ğayıp oldı. Başqaları sert rejimli müstemlekede 12, 15 ve atta 17 yılğa mahküm etildi. Bazıları içtimaiy ağlarda yazğanları içün taqip etile.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
