Qırımnıñ Lenin rayon mahkemesi Ukrayin Telegram kanallarında Ukraina Silâlı quvetleriniñ areketlerine qol tutqan ve Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) Ukrayin askerlerini beklegenini yazğan 30 yaşındaki naqliyat devlet şirketiniñ hadimine "Rusiye ordusınıñ itibarını tüşürgeni" içün para cezasını berdi.
Mayısnıñ 7-nde işğalli Sevastopol (Aqyar) polisi bunı bildirdi.
"Bu kibi "yazıcı" faaliyeti polis hadimleriniñ diqqatından qaçmadı. Müellifniñ şahsiyetini ve bulunğan yerini tez vaqıtta belgilediler", — denile beyanatta.
Qadınğa 45 biñ rublelik (13 500 ğrıvnâ) para cezası berildi.
Hatırlatamız ki, mayısnıñ 5-nde işğal etilgen Qırımda 223 insan qanunsız tutulğan edi, olardan 133-ü — Qırımtatar, dep Ukrayina prezidentiniñ Qırım MC temsilciligi bildirdi.
Bundan ğayrı, "Rusiye Federatsiyasınıñ ordusını itibardan tüşürüv" maddesine istinaden 1 325 dava açılğanını qayd ettiler. Olardan 1 190-ında para cezaları ya da davalarnıñ birleşüvi aqqında qarar alındı, 34 dava devam ete.
Daa evel Avropa insan aqları mahkemesi Rusiyeni söz serbestliginiñ sistematik basqısı ve Ukrayinağa qarşı cenkni tenqit etkeni içün insanlarnıñ taqip etilmesinde qabaatlı tanıdı. Avropa insan aqları mahkemesi ayrı qayd etti ki, Qırımdaki işğalli mahkemelerniñ bütün "qararları" qanunsızdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
