2025 senesi mayısnıñ 5-ne qadar vaqtınca işğal etilgen Qırımda 223 qanunsız azatlıqtan marum etüv adisesi qayd etildi, olardan 133-ü Qırımtatar halqınıñ vekillerine ait.
Ukrayina Prezidentiniñ Qırım Muhtar Cumhuriyetindeki Temsilciligi bu aqqında haber etti.
Bundan da ğayrı, yarımadada Rusiye Federatsiyasınıñ Memuriy uquq bozuvları qanunnamesiniñ 20.3.3 maddesine ("Rusiye Federatsiyasınıñ Silâlı quvetleriniñ itibarını tüşürüv") binaen 1325 memuriy dava adisesi qayd etildi. Olardan 1190 davasında ceza qararları çıqarıldı ya da davalar umumiy qararlarğa birleştirildi.
Olardan 34 davasınıñ baqılması devam ete. Umumen çıqarılğan qararlarnıñ 49%-i (582) qadınlarğa, 51%-i (607) erkeklerge ait.
Hatırlatamız ki, Ukrayinada belli olğan 100 vatandaş mabüsinden ibaret cedvel tizildi, oña tahminen 30 jurnalist kirdi. Vesiqa Rusiye tarafına Halqara Qızıl Haç Eyyeti vastasınen berildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
