İşğal etilgen Qırımda Rusiye Federatsiyasınıñ Rostov-na-Donu şeerindeki Cenübiy bölgeniñ arbiy mahkemesine Moldovanıñ 33 yaşındaki vatandaşına qarşı "terakt azırlavı" ve "patlayıcı cihazlarnı saqlav" maddelerine binaen cinaiy dava yollanıldı. İşğalciler onıñ Ukrayina mahsus hızmetlerinen işbirlik yapqanını tüşüneler.
Mayısnıñ 7-nde işğalli Qırım prokurorlığı bunı bildirdi.
İşğalli tahqiqatnıñ versiyasına köre, 2024 senesi yazda adam Ukrayina Mudafaa nazirliginiñ Baş istihbarat idaresiniñ hadiminen messencer vastasınen bağlandı ve "çetel istihbaratı içün vazifelerni eda etmege azır olğanını" bildirdi.
"O, kuratordan vazife aldı, oña köre o, Lenin rayonında (şimdiki Keriç rayonı — muar.) bölgeniñ ayat teminat obyektlerinden biri olğan pompa stantsiyasını patlatmaq kerek edi. O, öz başına yapılğan patlayıcı aletnen saqlanğan yerniñ koordinatlarını aldı ve ilerideki talimatlarnı beklep, saqladı", — dep "prokurorlıq" qayd etti.
Hatırlatamız ki, Moldova vatandaşı çiçek ayınıñ 14-nde Qırımda tutuldı.
QırımSOS malümatına köre, 2024 senesi Qırımnıñ işğalli mahkemeleri ve Rusiye Federatsiyasınıñ birinci instantsiya mahkemeleri eñ az 66 insannı qanunsız şekilde mahküm etti. Apellâtsiya mahkemeleri 25, kassatsiya mahkemeleri ise — 33 insannıñ davasını baqıp çıqtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
