Qırımda işğalciler Moldova vatandaşını tuttılar. Onı Keriç suv stantsiyasında "terakt azırlağanı"nda ve "Ukrayina mahsus hızmetlerinen işbirlik"te qabaatladılar.
RİA "Novosti Krım" bunı bildirdi.
İşğalli tahqiqatnıñ versiyasına köre, adam 2024 senesi çiçek ayında Ukrayina mahsus hızmetleriniñ vekilinen bağ qurdı.
"Onıñ vazifesi, Rusiye arbiy tehnikasınıñ yerleşüv yerleri, Rusiye AVSnıñ mevamı, naqliyat ve energetik astyapı obyektleri aqqında malümat toplamaq ve bermek edi", — dep aytıla haberde.
İşğalcilerniñ aytqanına köre, o, suv pompasını patlatmaq niyetinde olğan öz başına yapılğan patlav cihazı tapılğan bir saqlanğan yerni kösterdi.
Hatırlatamız ki, saban ayınıñ 24-nde "Tribunal. Qırım epizodı" uquq qorçalayıcı teşebbüsi bildirdi ki, Qırım sakinleri "aşırıclıq" aqqında maddeler boyunca cinaiy mesüliyetke daa sıq çekile. Bu qış böyle üç adise qayd etildi, 2025 senesi saban ayınıñ soñunda daa eki adise qayd etildi.
QırımSOSnıñ malümatına köre, 2024 senesi Qırımnıñ işğalli mahkemeleri ve Rusiye Federatsiyasınıñ birinci instantsiya mahkemeleri eñ az 66 insannı qanunsız şekilde mahküm etti. Apellâtsiya mahkemeleri 25, kassatsiya mahkemeleri ise 33 insannıñ davasını baqıp çıqtı.
Şimdi Rusiye apishanelerinde işğal etilgen Ukrayina topraqlarından 23 qadın tutula. Olardan yedisi mahküm etildi. İşğalciler olarnı "devlet hainligi" ve "casuslıq"ta qabaatlaylar. Bu, ZMINA insan aqları merkeziniñ malümatıdır. Uquq qorçalayıcılar, işğal etilgen topraqlarda qadınlarnıñ taqip etilüvi, işğalden soñ daa da sıq oldı, dep qayd eteler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
