Çiçek ayınıñ 30-nda işğalciler, işğal etilgen Qırımnıñ Canköy şeerinde yaşağan Qırımtatar, cerrah Hayet Hocarıhımovnıñ evini "tinttiler". Adamnı da sorğuğa çektiler.
QIRIM.News Meclis reisiniñ birinci muavini, sabıq siyasiy mabüs Nariman Celâlğa atıf etip, bu aqqında haber etti.
"Beklenilmegen "musafirler"niñ ziyareti neticesinde belli olğanı kibi, olar Hocarıhımovnıñ adına yazılğan bir qabaat bildirüvi sebebinden kelgenler. Bu seferki ziyaret qısqa edi ve şimdilik ciddiy aqibetleri yoq. Amma biz işğalli akimiyetke Ukrayinada vatandaşlarımızğa qarşı yapılğan bütün qanunsız areketlerini közetkenlerini köstermek içün açıqtan cevap berdik. Teessüf ki, işğalde qabaat bildirüvleri er künlik kerçek oldı", — dedi Celâl.
Celâl qabaat bildirüviniñ kim tarafından yazılğanını aytmadı.
Hatırlatamız ki, Qırımtatar maaliy merkeziniñ malümatına köre, 2025 senesiniñ birinci kvartalında işğal etilgen Qırımda 13 tintüv qayd etildi, olardan 7-si Qırımtatar halqınıñ vekilleriniñ evlerinde keçirildi.
Читати ще
Telegram, WhatsApp ve Facebookta Suspilne Qırım haberlerine abune oluñız
