Qırım siyasiy mabüsi, "Hizb ut-Tahrir davası"nıñ dörtünci Aqmescit gruppasınıñ iştirakçisi Raif Fevziyevniñ sağlıq vaziyeti fenalaştı, hususan, damarlarınıñ varikoz kenişleviniñ alâmetleri quvetleşti.
Qırımtatar Maaliy Merkezine onıñ apayı Liana Fevziyeva bu aqqında haber etti.
"Damarlarınıñ varikoz kenişlevi alâ daa kritik alda buluna, amma anda vaziyet qattı rejimge köre daa beter oldı: bütün kün ayaq üstünde turmaq mecbur, ve yatmağa az izin bereler — tek ekimlerniñ izninen", — dep QMM, Liana Fevziyevniñ sözlerini bildirdi.
Onıñ aytqanına köre, Raif Fevziyevni endi dört yıldır tuvğanlarınen körüşmege yasaq eteler. Bu vaqıt içinde bir telefon qonuşması oldı ve bir posolka yollanıldı.
Onıñ aytqanına köre, aş "normal": üylelikte domuz eti berile, amma Ramadan ayında memuriyet onı tuvar etine deñiştire ve namazlarğa keder etmey. Hatırlatamız ki, 2023 senesi qara qış ayınıñ 12-nde Rostov-na-Donudaki Cenübiy bölgeniñ arbiy mahkemesi Raif Fevziyevni Hizb ut-Tahrir teşkilâtında iştirak etkeninde qabaatlap, qanunsız şekilde 17 yılğa apiske aldı.
"Hizb ut-Tahrir davası"nıñ dörtünci Aqmescit gruppası aqqında ne bilemiz
2021 senesi arman ayınıñ 17-nde FSB musulman ve qırımtatarlarnıñ evlerini kütleviy şeklde tintti.
Tintüvlerden soñ işğalli quvetçiler beş insannı "terror teşkilâtınıñ faaliyetinde iştirak etüv"de qabaatlap yaqaladılar (Rusiye Ceza qanunnamesiniñ 205.5-nci maddesi). Aqyarnıñ (Sevastopolnıñ) Nahimov rayonında — faalci Rustem Murasov ve Rustem Tairov, Aqyarnıñ Balıqlava rayonında — Cebbar Bekirov, Bağçasaray rayonında — faalci Zavur Abdullayev, Aqmescit (Simferopol) rayonında — Raif Fevziyev.
2023 senesi qara qış ayınıñ 12-nde Rostov-na-Donu Cenübiy bölgeniñ arbiy makemesi Raif Fevziyevni 17 senege maküm etti. Daa soñra Vlasiha şeeriniñ Apellâtsiya arbiy makemesi ükümni deñiştirmedi.
Daa soñra, 2022 senesi kiçik aydan başlap, bu dörtünci Aqmescit gruppasına daa bir iştirakçi — Amethan Abdulvapov qoşuldı. Qırımtatar, sert rejimli müstemlekede 10,5 senege üküm etildi, soñra ise üküm deñiştirilmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
