17 senege maküm etilgen Qırım imamı, "Hizb ut-Tahrir davası"nıñ dörtünci Aqmescit (Simferopol) gruppasınıñ iştirakçisi Raif Fevziyev Rusiyeniñ Rostov vilâyetindeki 3-nci Novoçerkassk SİZOdan etap etildi.
Qırımtatarnıñ ömür arqadaşı Liana Fevziyeva ilk qış ayınıñ 20-nde "Qırım birdemligi" cemaat birleşmesine bergen izaatında bunı bildirdi.
Onıñ qayd etkenine köre, siyasiy mabüsniñ etapı aqqında soylarına Voronejdan, soñra ise Samaradan yazğanı mektüpleri sayesinde ögrendi. Aynı vaqıtta Fevziyeva aqayını qaysı apishanege alıp ketkenlerini bilmey.
"O, artıq mektüplerimizge cevap bermey. Büyük ihtimalnen onı endi alıp ketkenler", — dep qayd etti Kreml mabüsiniñ apayı.
"Hizb ut-Tahrir davası"nıñ dörtünci Aqmescit gruppası aqqında ne bilemiz
2021 senesi arman ayınıñ 17-nde FSB musulman ve qırımtatarlarnıñ evlerini kütleviy şeklde tintti.
Tintüvlerden soñ işğalli quvetçiler beş insannı "terror teşkilâtınıñ faaliyetinde iştirak etüv"de qabaatlap yaqaladılar (Rusiye Ceza qanunnamesiniñ 205.5-nci maddesi). Aqyarnıñ (Sevastopolnıñ) Nahimov rayonında — faalci Rustem Murasov ve Rustem Tairov, Aqyarnıñ Balıqlava rayonında — Cebbar Bekirov, Bağçasaray rayonında — faalci Zavur Abdullayev, Aqmescit (Simferopol) rayonında — Raif Fevziyev.
2023 senesi qara qış ayınıñ 12-nde Rostov-na-Donu Cenübiy bölgeniñ arbiy makemesi Raif Fevziyevni 17 senege maküm etti. Daa soñra Vlasiha şeeriniñ Apellâtsiya arbiy makemesi ükümni deñiştirmedi.
Daa soñra, 2022 senesi kiçik aydan başlap, bu dörtünci Aqmescit gruppasına daa bir iştirakçi — Amethan Abdulvapov qoşuldı. Qırımtatar, sert rejimli müstemlekede 10,5 senege üküm etildi, soñra ise üküm deñiştirilmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
