Sabıq siyasiy mabüs, Qırımtatar Milliy Meclisiniñ reisiniñ birinci muavini Nariman Celâl dedi ki, Ukraina, ukrain siyasiy mabüsleri kibi, istilâcınıñ basqısına boysunmağa istemey. Devlet "menfaatlarını eñ çoq köz ögüne alacaq barışıqnı talap ete".
O, kiçik aynıñ 25-nde Facebookta video muracaatında bunı bildirdi.
Bu munasebetnen Celâl, şimdi Rusiye apishanesinde bulunğan Qırım siyasiy mabüsi Asan Ahtemovnı hatırlattı. Rusiye quvetçileri makeme qararı ögünde oña qarşı qabaatlavnı tekrar yapmağa teklif etip, "işkence altında tutulğanınıñ ilk künlerinde imzalamağa mecbur olğan yalan malümatları"na riayet etmege teklif etken ediler.
Olar Asanğa apis müddetini qısqartmağa vade ettiler, amma o bunı yapmağa red etti. Rusiye apishanesinde bulunğanda Celâlnıñ özü de telükesizlik hadimleriniñ tekliflerini red etken edi.
"Bazı faydalar içün, menim kibi siyasiy mabüslerni zindandaşlarıma bermege talap ettiler. Tabiiy ki, er bir ahlâqiy adam kibi, men red ettim. Ve bugün Ukrainada olğan qararlarğa baqıp, men apishanedeki er bir mabüsniñ ayatında olğan şeylerni hatırlayım. Ve men Ukrainanıñ böyle tekliflerge "yoq" demek istegi ve küçü olğanından ğururlanam", — dep qayd etti o.
Celâl, Ukrainanıñ öz menfaatlarını qorçalamaq ve "bizim istegenimizge emiyet berecek barışıqnı talap etmek" küçüni tapqanından ğurur duya, dep qoştı. Ve bu neticeler bere, dep Meclisniñ reisiniñ birinci muavini qayd etti.
"Bizler itibarımıznı coymalımız, vaqtınca işğal etilgen topraqlarda yaşağan vatandaşlarımıznı unutmamalımız, Qırım, Luğansk, Donetsk ve duşman zapt etken er bir topraqnı unutmağa aqqımız yoq. Bizge küç berilse, duşman özüni ğalip saymaq mümkün", — dep qayd etti o.
Sabıq siyasiy mabüs, Ukrainanıñ "telükesiz ve serbest" kelecegi içün küreşke qoşulmaq imkânından ğurur duya, dep qayd etti.
"Bugün bizni desteklegen, Ukrainağa istilâcığa qarşı küreşmege imkân bergen er bir insanğa, er bir memleketke minnetdarım. Amma unutmayıq ki, er şey eñ evelâ özümizge bağlı. Eger biz küçlü olsaq, iç kimse bizni öz menfaatlarımızdan vazgeçmege mecbur etmez", — dep qırımtatar ayttı.
Nariman Celâl ve Ahtemov qardaşları aqqında ne bilemiz
Nariman Celâlov — 2016 senesi Rusiye tarafından "ekstremist teşkilât" olaraq tanılğan Qırımtatar Milliy Meclisiniñ başınıñ muavinidir. Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Celâlov 17 senege üküm etildi, 700 biñ ruble para cezasını aldı ve 1,6 sene devamında areket serbestligi sıñırlandı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
2024 senesi bozarğan aynın 28. künü esir etilgenlerniñ deñişmesi çerçivesinde Ukraina, Nariman Celâlnı evge qaytardı.
Telegram, WhatsApp ve Facebookta Suspilne Qırım haberlerine abune oluñız