İşğal etilgen Qırımda fermacılar ububattan vazgeçmege qarar alalar. Yaqarlıq qıtlığı ve elektrik energiyası kesilgeni sebebinden bu iqtisadiy ceetten elverişsiz ola. 2026 senesi mahsulatınıñ fiyatı öz fiyatından aşağı.
FortPost işğalli neşiri bunı bildirdi.
«Bu sene Qırımda ububat bereketi 62,4%-ge arttı ve 1,8 million tonna oldı. Faqat fermacılarnıñ çoqusı içün bu quvanmaq içün sebep degil: 13-15 rublelik bir kilogramm mahsulatnı eñ yahşı taqdirde 10 rublege satmaq mümkün», — dep qayd etildi neşirniñ haberinde.
İşğalli köy hocalığı naziri Denıs Kratükniñ aytqanına köre, logistika sebebinden ububat fiyatları muntazam sürette deñişe.
İşğalli ükümet, fermacılarğa bürtükli aşlıqlarnı deñiştirmege teklif ete, şu cümleden, tarlalarnı künaylan, raps ve ketennen ekmege teklif ete.
«Biz daa çoq kârlı olğan mahsulatlarğa diqqat ayırmalımız. Biz er yıl östürgen ububat miqdarını aşamaymız, bayağı aşlıq bar. O qadar çoq çıqarıp, büyük-tonnalı logistika ile oğraşmaq kerekmi-yoqmı añlamaq kerek. Çünki daa meraqlı aşlıqlar bar, olar nisbeten az miqdarda yahşı fiyatnı temin ete bilir», — dep añlattı Denıs Kratük.
Hatırlatamız ki, 2026 senesi mayıs ayında Milliy muqavemet merkezi, Ukrayinanıñ vaqtınca işğal etilgen topraqlarındaki fermacılarnıñ stabil satış bazarları olmağanı sebebinden müflis olacaqları bildirgen edi. Vaziyet kerginleşti: fermacılar iqtisadiy ceetten maqsatqa uymağanı içün çoq miqdarda sebze atmağa mecbur oldılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız