Rusiye taqiqat eyyeti "Qırım kollektsiyası" medeniy degerlikleriniñ "hırsızlanması ve qaytarılmaması" boyunca cinaiy davanı açqanını bildirdi. Söz "skit altını" aqqında yürsetile. Qabaatlavlar Felemenk, Ukrayina ve Allard Pirson arheologik müzeyi memurlarına qarşı açıldı.
Saban ayınıñ 11-nde Telegramda Rusiye Tahqiqat eyyeti bu aqqında haber etti.
Müessise vekili Svetlana Petrenkonıñ aytqanına köre, 2013 senesi Almaniya ve Felemenkte "Qırım — Qara deñizdeki altın ada" sergisi çerçivesinde numayış etilgen 565 artefakt aqqında söz yürsetile. Olarnıñ sigorta qıymeti 117 million rubleden ziyadedir, bazı şeyler ise "dünya medeniyetinde analogları olmağanı içün qıymetsiz" dep adlandırıldı.
2021 senesi Amsterdam Apellâtsiya mahkemesi, Rusiye tarafı "hırsızlav" olaraq tanığan kollektsiyanı Ukrayinağa bermege qarar aldı.
"Rusiye Federatsiyasınıñ Ceza qanunnamesiniñ 12-nci maddesiniñ 3-nci qısmına köre, Rusiye Federatsiyasından tış cinayet işlegen çetel vatandaşları ve vatandaşlığı olmağan şahıslar, eger cinayet Rusiye Federatsiyasınıñ menfaatlarına qarşı yapılğan olsa ve bu şahıslar içün bu cinayet boyunca çetel devletiniñ mahkeme qararı olmasa, Rusiye Federatsiyasınıñ Ceza qanunnamesine binaen cinaiy mesüliyetke çekileler", — dep haberde qayd etildi.
Rusiye Taqiqat eyyeti qoştı ki, taqiqat devam ete.
Hatırlatamız, 2025 senesi qara qış ayınıñ soñunda işğalli Qırım müzeyleri Rusiye mahkemesine "skit altını" kollektsiyasınıñ "Ukrayina tarafından qanunsız şekilde tutulması" boyunca dava azırlağanlarını bildirdi, onı 2023 senesi Kıyivge qaytardılar. İşğalciler akimiyetniñ vekilleri ve uquqçılardan ibaret iş gruppasını teşkil ettiler.
2025 senesi ilk qış ayında devletke 7 biñden ziyade arheologik artefakt berildi — memleketniñ müzey fondlarını toldurğan eñ büyük kollektsiya. Tapılğanlarnıñ bir qısmı Qırım ve diger tarihiy bölgelerden kele. Olarnı sabıq Qırım memurına dair taqiqat vaqtında taptılar, dep Baş prokurornıñ ofisi bildirdi.
Daa evel Poloniyada Rusiye arheologı Aleksandr Butâginge Qırımda qanunsız şekilde qazılğanı içün şübe bildirildi ve o apiske alınğan edi.
Qara qış ayınıñ 15-nde Varşava okrug mahkemesi qapalı rejimde Rusiye arheologınıñ Ukrayinağa ekstraditsiyası davasını baqqan edi. Suspilne Qırım muarririyeti oña qarşı mahkeme davası aqqında tafsilâtlıca tarif etti.
Qırım Muhtar Cumhuriyeti prokurorlığı Suspilne Qırımğa Butâginniñ dava açılğan bir qaç arheologdan biri olğanını bildirdi: umumen yedi şübelengen adam bar, olarnıñ arasında Qırımdaki qazmalarda iştirak etken em Rusiye, em de Ukrayina vatandaşları bar.
"Skit altını" aqqında ne bilemiz
"Qırım hazineleri" ya da "skit altını" içün Ukraina on sene devamında Felemenkte yarımadanıñ işğalli müzeylerinen dava etti, çünki 2014 senesi Rusiye Qırımnı zapt etkende eksponatlar Amsterdamda sergide buluna edi.
2023 senesi bozarğan aynıñ 9-nda, aman-aman 10 senelik makeme davalarından soñ, Felemenkniñ Yuqarı makemesi Allard Pierson müzeyini "Qırım - Qara deñizdeki altın ada" sergisinden eksponatlarnı Ukraina Milliy tarih müzeyine bermege mecbur etti.
"Skif altını" 2023 senesi boş ayda Felemenkten Ukrainağa qayttı. Kıyivge yarımadanıñ dört müzeyinde "Qırım: Qara deñizniñ altını ve sırları" sergisinde taqdim etilgen artefaktlar berildi.
2694 kilogramm qadimiy hazinelerni yük maşnasınen Kıyiv-Peçersk Lavrınıñ toprağına alıp ketirdiler. Degerliklerniñ teşkerüvini Kyiv gümrükçileri Ukraina Milliy müzeyi hazinesinde keçirmege kerek ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız