Qırımnıñ Bağçasaray rayonınıñ Ğlıbokıy Yar köyünde işğalciler qırımtatar Nariman Seitalievniñ evini tinttiler. Onı tutıp, evden alıp kettiler.
Kiçik aynıñ 12-nde Seitalievniñ aqrabaları ''Qırım birdemligi'' cemaat teşkilâtına bunı bildirdiler.
Olar qayd ettiler ki, 42 yaşındaki qırımtatar apayınen beraber beş balalarını östüreler.
Seitalievniñ apayı Zarema haber berdi ki, Moskva vaqtına köre saar 04:00-te qapını qaqtılar. O, qapını açıp, aqayını birden tabanğa tüşürdiler, ellerini arqasında tuttılar ve buğavlarnı taqtılar. Odağa tahminen on insan kirdi. Qırımtatarğa vesiqanı oqumağa bergen soñ evini tintmege başladılar.
Quvetçiler evini diqqatnen tinttiler, vesiqalarına diqqatnen baqtılar, şu cümleden bala eşyalarını baqtılar. Tintkende bir şey almadılar, amma bundan soñ quvetçiler yasaq etilgen kitaplarnı kördiler.
Zarema qayd etti ki, olarğa advokatnen bağlanmağa izin bermediler. Evi tintilgen soñ bunı yapa bileceklerini ayttılar. Aqayınıñ vesiqaları, cep telefonı ve aileniñ aytqanına köre, quvetçilerniñ ketirgenleri eki kitap alındı.
"Olar balalarnı pek qorquttılar. Balalar, tamamınen ne olğanını añlamaylar, amma o qadar büyük stress yaşadılar. Soñunda bizge sağlıqlaşmağa ve eşyalarını toplamağa tek 15 daqqa berdiler", — dep tutulğan adamnıñ apayı ayttı..
Tintüvden soñ Seitalievniñ apayı özüni yaramay duydı. Onıñ qan basımı köterildi, acele yardım çağırıldı. Ekimler ine yapıp, ilâc berdiler.
"Nariman Seitalievge qarşı mahkeme oturışı Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ — terciman) Kıyiv rayon mahkemesinde saat 16:00-da (Moskva vaqtına köre — muar.) keçirilecek. Davanı mahkemeci Olga Kuznetsova baqa. Oturış qapalı şekilde keçecek", — dep "Qırım birdemligi" bildirdi.
Hatırtlatamız ki, 2025 senesi işğal etilgen Qırımda 244 tevqif qayd etildi, olardan 90-ı — qırımtatarlarğa qarşı edi, dep Qırımtatar Resurs Merkezi haber berdi.
Aynı zamanda 2025 senesi ilk qış ayında işğal etilgen Qırımda dört ev tintildi, 14 adam tutuldı, 10 adam soğruğa çekildi ve ''subet'' keçirildi, em de 20 adam tevqif etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız