Çiçek ayınıñ 1-inden başlap işğalcilerniñ keçirgenleri Qırımda "baar mobilizatsiyası" çerçivesinde 2,5 biñ insannı mobilizatsiya etmege planlaştıralar.
RİA "Novosti Krım"ğa tesfir etkende yarımadanıñ işğalli arbiy komissarı polkovnik Yevheniy Maşukov bu aqqında haber berdi.
"Çiçek ayında arbiy qısımlarğa yollaycağımız bütün taqımlar şekillendi, çiçek ayınıñ 15-inde ilk taqımlar yollanacaq. Dört kün devamında arbiy urba kiyip, askerniñ şahsiy elektron kartlarını yazıp, aylıq içün bank kartlarını vesiqalaştırmaq içün çiçek ayının 11-inde başqa bölgelerden bizge vatandaşlar kelmege başlaycaqlar", — dep bildirdi.
Yarımadanıñ belediyelerinde endi 25 "mobilizatsiya eyyeti" teşkil etildi, o yerden yañı askerlerni qırım "eyyeti"ne yollaycaqlar. RF Mudafaa nazirliginiñ Cenübiy arbiy bölgesiniñ planına köre, çiçek ayınıñ 15-ine qadar Qırımda 2,5 biñ insannı mobilizatsiya etmege planlaştıralar.
Qırımda baar "mobilizatsiyası" aqqında ne bilemiz
Keçenlerde 2024 senesiniñ I. üç ayı devrinde işğal etilgen Qırımda insan aqlarınıñ bozmalarınıñ talilini taqdim etkende Qırımtatar Maaliy Merkeziniñ (QMM) idaresiniñ başı Eskender Bariiev haber berdi ki, çiçek ayınıñ 1-inde başlağan işğal etilgen Qırımda doquzıncı qanunsız mobilizatsiya kampaniyası çerçivesinde ruslar, yarımadanıñ 15 biñge qadar sakinini mobilizatsiya etmege planlaştıralar.
O qoştı ki, 2024 senesi çiçek ayınıñ 20-sinden başlap Qırımda Rusiye, yañı qanunsız mobilizatsiya dalğasını azırlay. Bariiev daa bildirdi ki, işğalciler qırım faalcilerini destek etmeleri maqsadınen "davaları"nen bağlı makeme oturışlarına ketken diñleyicilerge mobilizatsiyanamelerni berecekler. Şu cümleden, Lenura Yakubovanıñ makeme oturışında qırımtatar faalcisi Ali Seytablayevge mobilizatsiyaname berdiler.
Telegram ve Facebookta Suspilne Qırım haberlerine abune oluñız
