Kiçik aynıñ 22-siniñ sabasında işğalciler, faalci ve jurnalist Lütfiye Zudiyevanıñ evini tinttiler. Bundan soñ Lütfiye Zudiyevanı Aşırıcılıqqa qarşılıq merkezine alıp kettiler. 3 saat anda buluna edi. Onı yibergen soñ faalci añlattı ki, "kütleviy malümatRF MBQniñ 13.15. maddesiniñ 2. qısmı ve 2.1. qısmı azatlığı suisitmalı" sebebinden oña qarşı memuriy protokollar tizildi.
"Qırım birdemligi" bu aqqında haber berdi.
İşğal uquq qorçalayıcı organlarınıñ işçileri, Lütfiye Zudiyevanıñ evinden video nezareti sisteması, fleşkaları, laptobı ve cep telefonını, 18 yaşına yetmegen balalarınıñ cep telefonlarını da alıp çıqardılar.
Bundan ğayrı, uquq qorçalayıcınıñ sözlerine köre onıñ eki malümat kâğıtı alınıp çıqarıldı - siyasiy mabüs Nariman Celâlnıñ "Men qalırım" adlı cıyıntığını ve Rusiye Federatsiyasınıñ uquq qorçalauıcılarınıñ maruzaları cıyıntığı "Yakunin oturışları". Bu, er sene uquq qorçalayıcılarnıñ iştirak etkenleri körüşüvdir.
Taqiqat tedbirleri bitken soñ Aşırıcılıqqa qarşılıq merkeziniñ işçileri Roman Filatov ve Ruslan Şambazov protokol tizmek içün, jurnalistni Aqmescitteki Aşırıcılıqqa qarşılıq merkezine alıp kettiler.
"E" merkezinde bir qaç sual berdiler, RFnıñ Qanınnamesiniñ 51. madesine bianen men olarğa cevap bermege red ettim. Biz advokat Emil Mahsudovıçnen añlaştıq ki, makeme oturşında öz fikirlerimizni añlatacaqmız. Davanıñ bütün bilgilerini ve postlarını ögrenecekmiz. Bizim fikrimizce, olarnıñ cinayet delili yoq", — dep Lütfiye Zudiyeva añlattı.
Ukraina prezidentiniñ QMCdeki daimiy temsilcisi Tamila Taşeva Suspilne Qırımğa tefsir etti ki, işğalciler işğalge qarşılıq köstergen cemaat vatandaşlarını ve faalcilerni basım etmege devam eteler.
"Bu, tecavuzcı bir devlet ve işğalcilerniñ qanunsız qorqutıcı ve taqip areketleridir. Olar, işğalge ve insan aqları bozmalarına qarşılıq kösterömege devam etken jurnalistler ve faalcilerge tesir etmege tırışalar. Halqara uquq ve ukrain qanunlarına köre, bu areketler qanunsızdır", — dep Taşeva qayd etti.
Lütfiye Zudiyeva aqqında ne bilemiz
Lütfiye Zudiyeva, "Qırıjm birdemligi"niñ faalcisi ve "Gratı"nıñ jurnalistidir. Qırımdaki makeme ceryanları ve insan aqları bozmalarını aydınlata. 2014 senesinden evel bala merkezini reberlik ete edi, işğalden soñ ise uquq qorçalav saasında çalışmağa başladı.
2019 senesi içtimaiy ağlarda post sebebinden Zudiyeva tutuldı. O zaman "aşırıcılıq timsaller"nen paylaşqan faalci, 2 biñ ruble cezasını ödedi.
Oraq ayınıñ 27-sinde işğal etilgen Qırım Yuqarı makemesinde video bağ vastasınen Soçi şeerindeki umumiy yurisdiktsiyalı Üçünci Apellâtsiya makemesinen berbaber "Nariman Celâl ve Ahtemov qardaşlarınıñ davası"na bianen üküm çıqarıdı. "Makeme" binası ögünde Lütfiye Zudiyeva da tutuldı. Birazdan jurnalistke 12 biñ rublelik para cezasını berdi. 2024 senesi kiçik aynıñ 12-inde RF Kasatsiya makemesi, para cezasına şikâtenamesini baqmağa aldı.
Kiçik aynıñ 22-siniñ sabasında işğal uquq qorçalayıcıları organlarınıñ işçileri, Lütfiye Zudiyevanıñ evini tinttiler. Bundan soñ faalcini böyle degen Aşırıcılıqqa qarşı merkezine kettiler. 3 saat anda buluna edi. "Kütleviy malümat azatlığı suisitmalı" sebebinden oña qarşı memuriy protokollar tizildi.
Telegram ve Facebookta Suspilne Qırım haberlerine abune oluñız
