13 senege maküm etilgen çoq balalı baba, "Hizb ut-Tahrir davası"nıñ ekinci Bağçasaray gruppasınıñ iştirakçisi Server Zekiryayev eki aydır kamera türlü odada tutalar ve ailesinen körüşmege izin bermeyler.
"Qırım birdemligi"ne tefsir etkende siyasiy mabüsniñ apayı Zarema Zekiryayeva bunı añlattı.
O, Rusiyeniñ Tula vilâyetiniñ Donskıy şeerindeki 1. tüzetici müstemlekede buluna. Keçken sene boş aynıñ 26-sında müstemlekeniñ memuriyeti, qırımtatar adamını PKTge ketirmege qarar berdi. Bu, anda tevqif etilip bulunğan "rejim şiddetli bozğan"larnıñ izolâtsiyasıdır.
İşğal etilgen Qırımdan tek tevqif etilgen Zekiryayevniñ tutuv şartlarını zorlaştırıp turalar. 2023 senesi kiçik ayda o deyerli bir sene ŞİZOda (ceza izolâtorında), SUSta (şiddetli tutuv şartlarında) ve PKTde keçirdi.
2022 senesi berim ayında Zekeryayeva öz aqayını soñ kere kördi. Amma şimdi onen körüşmege izin bermeyler. Müstemlekeniñ işçileri, maddesinen Kreml reinesine munasebetniñ şeddetligini isbatlaylar.
"Onıñ kamerasına kireler ve bozma yazıp qoyalar. Ciddiy bir cinayetçige kibi baqalar", — dep qayd etti o.
Server Zekiryayev aqqında ne bilemiz
Tevqif etilmegen evel Zekiryayev beden tasili ocası olıp çalışqan ve çiçekçilik yapqan edi. Onıñ 13 balası bar, adam tevqif etilgen soñ soñki balası doğdı. Siyasiy mabüsniñ saqatlı qızı bar, onıñ doğuvdan san çıkığı bar.
2017 senesi ekim ayınıñ 11-inde Bağçasarayda FSB işçileri altı qırımtatar adamını tuttılar: Server Zekiryayev, Tımur İbrahimov, Marlen (Süleyman) Asanov, Memet Belâl, Seyran Saliyev ve Ernes Ametov.
2018 senesi mayıs ayınıñ 21-inde bu cinaiy dava çerççivesinde Edem Smayilov ve Server Mustafayev tevqif etildi. Er kes Rusiyede terrorcı bir teşkilât olaraq tanınğan, amma dünyanıñ ülkeleriniñ çoqusında ve Ukrainada serbest şekilde faal etken Hizb ut-Tahrir islâm siyasiy fırqasınıñ faaliyetine ait olmaqta şübelendi.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde "Hizb ut-Tahrir davası"nıñ ekinci Bağçasaray gruppasını üküm ettiler. Qırımtatarlarnı 13-19 senege maküm ettiler.
2019 senesi oraq ayınıñ 18-inde Avropa parlamenti bir rezolütsiya çıqardı. Anda Rusiyeni bütün ukrain siyasiy mabüslerini, ve ekinci Bağçasaray gruppasınıñ iştirakçilerini azat etmege çağırdı.
