Qırım sakini Oleksandr Tarapon eki buçuq yıl apis cezasından soñ azat etildi. O, "Rusiye ordusınıñ itibarını tüşürgeni"nde qabaatlanıp, apis cezasını çekken edi.
"Apishane advokatı" leyhası bunı bildirdi.
Hatırlatamız ki, Oleksandr Tarapon 2022 senesi saban ayında tutuldı.
İşğalli tahqiqatnıñ malümatına köre, adam şeherde Ukrayinanıñ tarafında cenkte iştirak etken apayınıñ soy-sopı aqqında levhalarnı yapıştırdı.
2022 senesi orta küz ayınıñ 21-nde vaqtınca işğal etilgen Aluştadaki qanunsız "mahkeme" Oleksandr Taraponnı sert rejimli müstemlekede eki yıl ve altı ayğa üküm etti. Apis cezası, prokurornıñ talap etkeninden yarım yıl çoq oldı. Apellâtsiya mahkemesi 2023 senesi qara qış ayınıñ 17-nde ükümni deñiştirmedi.
İlk qış ayınıñ soñunda adamnı qanunsız şekilde Rusiyege alıp kettiler, anda onı çeşit apishaneler arasında — başta Rostov-na-Donu ve Volgogradğa alıp kettiler. Bundan soñ yarım yıl Hasavyurtta, daa eki ay Mahaçqalada keçirdi. 2023 senesiniñ yazında Oleksandrnı Stavropol ülkesindeki 3-nci tüzetüv müstemlekesine avuştırdılar.
Hatırlatamız ki, QMMniñ malümatına köre, 2025 senesiniñ birinci kvartalında işğal etilgen Qırımda 38 qanunsız yaqalanuv qayd etildi, 14-ü "Rusiye ordusını itibardan tüşürgen"i içün tutuldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
