İşğal vaqtında Qırımda 200-den çoq arheologik abide bayağı zarar kördi. Eñ azından 80 mezarlıq, 40-tan çoq meskün yer ve qasaba ve 20 yerastı nekropol bar.
Çiçek ayınıñ 18-nde, Ukrayina tarihı ve medeniyetiniñ hatıra künü, Ukrayina prezidentiniñ Qırım Muhtar Cumhuriyetindeki temsilciligi bu aqqında haber etti.
"Olarnıñ arasında — Otarköy (Frontove) köyü yanındaki unikal mezarlıq kompleksleri, Hersonesniñ nekropolı, Vranautka (Gonçarne) köyündeki krematsiyalarnen mezarlıq, Carcara (Keriç yarımadası) özeniniñ aşağı yalısında elitar mezarlıqlar. Böyle qazmalardan alınğan şeyler de Rusiye işğalli memuriyet organları tarafından zapt etildi. "Rusiye ordusı tarafından zapt etilgen onlarnen obyekt (Pans şeerçigi ve mezarlığı, Arabat qalesi, Or-Qapu qalesi ve Or şeeri) iç bir tedqiq yapılmayıp yoq etildi", — dep aytıla haberde.
2014 senesi mayısnıñ 21-nde, prezidentniñ temsilciliginiñ haber etkenine köre, işğalciler Ukrayina devletiniñ cedvelinde olğan bütün taşınmaz abidelerni zapt ettiler. Kelecek 10 yıl devamında müzeylerniñ işğalli memuriyetleri ve idare organları obyektlerni Rusiye cedvellerine kirsettiler, olarnı öz mülkiyetine yazdırdılar, sıq-sıq böyle obyektlerniñ qıymetini körmediler: Hersonesniñ UNESCO obyektiniñ saqlanuv talaplarını yerine ketirmediler, Bağçasaray toprağında tamir işlerini başladılar.
"2014 senesi Qırım işğal etilgen soñ Rusiye Hansaraynıñ "restavratsiyası"nı başladı, bu ise, aslında, onıñ yoq etilmesidir. Büyük Han Cami eñ çoq zarar kördi: cevir ağacından yapılğan tamir etilgen tavan çıqarıldı, altınnen örtülgen buzağı terisinden plafon yoq etildi, qadimiy ağaç avize izsiz ğayıp oldı", — dep aytıla haberde.
Hatırlatamız ki, Qırım reintegratsiyası birleşmesiniñ Facebook saifesinde, işğalli medianıñ malümatına esaslanıp, işğalciler Bağçasaraydaki Hansaraynıñ qadimiy freskasını yoq etkenlerini bildirdiler. İşni yapqan qurucılar, bu eski gips olğanını tüşünip, örtüvni çıqardılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
