İşğal etilgen Qırımda aqiqiy qış boranları qutura: qar yağdı, yalılarnı suv bastı, transport areketine keder etti ve bazı qasabalarnı elektriksiz qaldırdı. Dağlı ve ormanlı yerlerde maşnaları qar tuzaqlarına tıqılğan aydavcılarğa qurtarıcılar yardım eteler.
Bunı işğalci Qırım FVN Fevqulâde vaziyetler nazirligi(Fevqulâde vaziyetler nazirligi) haber ete.
Avanıñ kerginleşüvi aqqında haberlerine baqmadan, bazı aydavcılar havfsızlıq qaidelerini körmemezlikke urğanlar. İşğalci Aqmescit avariy-qurtaruv otrâdınıñ hadimleri maşnalarnı evakuatsiya etmek içün yolğa eki kere çıqtılar.
Yerli Telegram kanalları haber ettiler ki, Qırımnı daa 11 aprel cuma künü qışlıq qar boranları qapladı, raatlıq künü sabasında ise stihiya eñ yüksek seviyege çıqqan.
Ay-Petride ise Yalta tarafından yolunı vaqtınca qapatqanlar. Belediye temizlik tehnikası böyle çalışa.
Angarskiy boğazı qarnen qaplanğan. Obyektte mahsus tehnikası nevbetçilik ete.
Belediye hızmetler yollarnıñ temizlevi üzerinde çalışalar, amma küçlü qar aqıntıları ve buzlu şaraitler sebebinden yol yürüşi soñ derece ağır qalmaqta.
Cenübiy yalıdaki bazı kurort şeerçikleriniñ yalıları küçlü yağmurlar sebebinden suv astında qaldı. Akimiyet, sakinlerni acele ihtiyac olmadan evden çıqmamağa ve şahsiy transportnen qulanmamağa çağıra.
Bundan da ğayrı, Bağçasaray rayonında yedi qasaba elektriksiz qaldı — Ğolubınka, Aromat, Sokolıne, Polâna, Putılivka, Novopillâ ve Bağata Üşçelına. Qaranlıqnıñ sebebi elektrik şeritlerindeki qazası oldı, belki de qomşu Rusiyedeki Rostov atom elektrostantsiyasındaki problemlernen bağlıdır.
"10 kV ağında (yüksek kerginlikli sızıqlarda) olğan zararlar tüzetile", — dep haber ete RF nezareti astında olğan Bağçasaray rayonınıñ memuriyeti.
Telegram, WhatsApp ve Facebookta Suspilne Qırım haberlerine abune oluñız
